Atuarfiit nuna avannarlerniittut qasungavallaarput
Kalaallit Skandinaviamiullu inuusuttai ataatsimoorussamik ajornartorsiuteqarput, inuusuttut pillugit immikkut ilisimatusarsimasoq Terje Olsen oqarpoq.
- Inuusuttut ilinniakkaminnik unitsitsiinnartarnerat nunani avannarlerni nunaqartuusugut tamatta ajornartorsiutigaarput. Inuussutissarsiutiginiarlugu ilinniarfimmi ilinniarnertuunngorniarfinnilu ilinniartut 20-40 procentit naammassineq ajorput.
Norgmimiu ilisimatooq Nordisk Velfærdscenterimi Stockholmimiittumi sulivoq. Suleqatinilu ulluni makkunani angalaarput, maannalu Nuummiillutik.
Meeqqat atuarfiani atuariartotarnerup nunani avannarlerni nalunaarsuinerup ilaatigut pimoorunneqarujussuartannginnera pissutaalluni inuusuttut ilinniarfianni ilinniarnerminnik unitsitsiinnartarneq ajornartorsiutaavoq.
- Ileqquunikuuvoq maannakkut allanngoriartortoq. Tassami meeqqat atuarnerata nakkutigineqarnera pimoorunneqarnera annikinnikuummat, Terje Olsen oqarpoq.
Meeqqat avannaamiut atuannginnerat aatsaat kingusinnerusukkut nalunaarsorneqalertarput, ilinniakkaminnillu unitsitsiinnartarnerannut tamanna kingusinnerusukkut pissutaaqataasinnaalluni, Terje Olsen oqarpoq.
Nakkutiginninneqannginneq kisimi pissutaanngilarli. Ataatsimoornermik atorfissaqartinneqarnermillu ilinniartut misigisimanissaat pingaaruteqarpoq.
Inuussutissarsiutiginiarlugu ilinniartut ilinniarnertuunngorniarfimmilu ilinniartut pingajorarterutaannai naammassisartut kisitsisinik misissuigaanni takuneqarsinnaavoq. Ajornartorsiulli ukiut arfineq pingasut ingerlaneranni pitsanngoriarnikuuvoq, inuussutissarsiutiginiarlugu ilinniartut affai soorlu ukioq kingulleq naammassisut.
Kalaallit Nunaanni Skandinaviamilu ilinniakkamik unitsitsiinnartarnermut pissutaasut misissoraanni assigiissuseqartut paasineqarsinnaavoq.
- Illoqarfmmit najukkaminnit ilinniarniartut ilai aallartariaqartarput. Ilaquttaninngaanniit kammalaatininngaanniillu taamaasillutik qimaguttariaqartarlutik. Tassanngaannarlu namminiileriasaartarput, ilaallu tunniutiinnarlutik uniinnarttarput, inuusuttut pillugit ilisimatooq oqarpoq.
Norgemi meeqqat atuarfianni massakkut misilittaasoqarpoq, ilinniakkamik unitsitsiinnartarneq akiorniarlugu. Tassaasoq:
- Sakkortuumik ilinniartitsineq ukioq arfaq naggataaq meeqqat atuarfianni misilittarneqaleruttorpoq, Terje Olsen oqarpoq.
Inuit pisariaqartitsisut pillugit ilisimasat nutaat saqqummiunniarlugit, Ilisimatuut Nordisk Velfærdscenteriminngaanneersut Nuummi Katuami ulluni makkunani katersuussimapput, inuusuttut suliffissaaleqisut, piitsuussuseq aamma innarluutilinnut politikki oqaluuserineqarlutik.