Atuarfiit nittartagaqalerput

Tasersuup atuarfiani pisortap, Lars Christiansenip pingaartippaa atuarfiup atuisunut, angajoqqaanut innuttaasunullu assitigut oqaluttuatigullu ilisaritinnissaa. Nittartagaq atuleqqammersoq angajoqqaat soqutiginnittullu akornanni oqallissinnaanermik periarfissiivoq.

Atuartut aamma nittartagaq aqqutigalugu oqaatsit ordboginut allanullu atuarnermut iluaqutaasinnaasunut pisariaqartitaminnik ujarlernissaat periarfissaqarpoq. Nittartakkami aamma atuartut efterskolenut ingerlariaqqiffissanullu assigiinngitsunut misissuinissamut aqqutissiuunneqarput.

Meeqqat atuarfii allat soorlu Nuummi Ukaliusaq ASK-ilu kiisalu Sisimiuni Nalunnguarfiup atuarfia, Tasersuup atuarfiata nittartagartaavanut assingusunik peqareerput. Tamannalu ineriartorneq atuarfinnut siunnersorteqarfimmit Inerisaavimmiit pitsaasutut isigineqarpoq.

- Nittartakkat ammasuunissamut, akuunissamut oqalliseqataanissamullu sakkussaapput. Attaveqatigiinnikkut suleqatigiinneq pitsaanerusoq anguneqarsinnaavoq, Inerisaavimmi pisortaq Louise Richter KNR.gl-imut oqarpoq.

Ukaliusap atuarfiani nittartakkap qanoq atorneqartigineranik misissuisoqarneq ajorpoq, tamanna piumasaqaataanngimmat. Atuartulli ilinniartitsisullu ilisimalereerpaat nittartagaqartoq.

- Pingaarnertut suliassaraarput nittartakkamut sakkussanik periarfissanillu sapinngisamik ikkussuisarnissaq. Taava apeqqutaaginnarpoq atuisut qanoq atorniarneraat, ilinniartitsisoq Jeppe Jepsen, nittartagalereqataasoq KNR.gl-mut taama oqarpoq.