Atuarfiit millionip affaata missaanik tunineqarput

Nunat Avannarliit ministeriisa siunnersuisoqatigiiffiata atuarfinnut tunngaviliivinnut inuusuttunullu ilinniarfinnut suleqatigiiffiata taaguuteqartup "Nordplus Junior" 570.000 koruunit Nunat Avannarliit akornanni aalisakkerivinni inuussutissalerinermilu ilinniartitaanerat pillugu suleqatigiilernissaannut aningaasaliissutigisimavaat. Nunat pineqartut tassaapput Danmark, Kalaallit Nunaat, Island, Norge aamma Savalimmiut.
Allattoq Karsten Sommer
juunip 26-at 2013 08:27

Aningaasaliissutit annerusumik aalisakkerivinni ilinniartitsisut attaveqatigiinnerulernissaannut atorneqassapput. Siunissami ilisimasatik, misilittakkatik piginnaasatillu paarlaassoqatigiissinnaaqqullugit. Anguniagaavoq ilinniarfinni ilinniartitsisut pikkorissartinneqartarnissaat.

- Nunat pineqartut tamarmik ataatsimik marlunnilluunniit aalisanermut tunngasunik ilinniarfeqarput, ilinniartitsisullu akornanni misilittakkat paarlaassortarnissaat isumassarsiorsinnaanerlu pisariaqartinneqarput , ilinniakkat pitsanngorsaavigineqassapput, Danmarks Fiskeriskole-mi pisortaq Søren Hyllen Nielsen Radioavisimut oqarpoq.

Attaveqaqatigiittussat tassaapput norgimi Nordkapp Maritime College, Savalimmiuni Vestmanna Fisheries College, Danmarkip Islandillu Fiskeriskolii.

Attaveqatigiittussani kallallini peqataasuugallassaaq Narsami Inuussutissalerinermik Ilinniarfik, Inuili.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq