Atuarfiit arfinillit kisimik atuartunut nerisaqartitsisarput
Naalakkersuisut ukiumi atuarfiusumi 2007-2008-mi atuarfinni nerisitsisarnermut tapiisalermatali, atuarfiit maannamut arfiniliinnaat nerisitsisalernissamut qinnuteqartut taperneqarsimapput.
Inatsisartut ukiumut 6,5 millioni koruuninik aningaasaliissuteqartaraluartut 2,5 millioni koruuniinnaat atorneqartarput.
Qinnuteqartukinnera tamatumunnga pissutaasoq, ilinniartitaanermut pisortaqarfimmi immikkoortortami pisortaq, Kaali Olsen, oqarpoq.
- Qinnuteqartut ikinnerannut pissutaasinnaavoq, atuartunik nerisitsinermi aningaasartuutit affaat kommunit namminneq akilertussaasarmassuk, aamma pissutaasinnaavoq, atuarfimmi nerisarfeqarnissamut periarfissaalatsineq, Kaali Olsen eqqoriaavoq.
Kalaallit Nunaanni illoqarfinni meeqqat atuarfii 23-upput, nunaqarfinni 54-iullutik. Meeqqat atuarfii nerisitsisartut arfinillit ukunaniipput - Qassiarsuk, Qaqortoq, Maniitsoq, Sisimiut, Tasiilaq aamma Qaanaaq.
