Atuaqatigiit angalanerat iluatsilluarpoq

- Suut tamarmik tupinnaqaat. Kalaallit Nunaanniiginnarnissaq kissaatiginaraluarpoq, nukappiaraq Bogø Kostskolemi 8. klassimi atuartoq, Illoqqortoormiut eqqaanni sapaatip akunnerani asimi qanoq uumaniartoqarsinnaaneranik misileereerluni taama oqarpoq.

Atuaqatigiit Danmarkimi silap pissusaa pillugu sammisaqallaqqinnerpaatut ajugaanerminnut atatillugu Nunatsinnut angalaqqammerput.

Atuartut 15-iusut maanna angerlamut utereersimalerput, angalanerallu iluatsilluarsimaqaaq. Kira Petersen, 15-inik ukiulik angalanermini isumassarsitinneqarsimavoq.

- Angerlamut utereernitta kingornagut isumaliutigaara immap uumasuinik ilisimatuunngorniarniarlunga. Pinngortitaq soqutiginartorujussuuvoq aamma eqqarsariarnissamut ilinniarfiuvoq, Kira Petersen aviisimut Politikenimut oqarpoq.

Atuartut ilaatigut misilitaat tassaapput qimusserneq, sikumi aalisarneq, qaqqamut majuarneq aamma puisimik pilallutik misilippaat.

- Soqutiginnilluinnarlutik peqataapput. Puisi tamakkerlugu pilappaat nerillugulu, angalanermik aaqqissuisut ilaat taama oqaluttuarpoq.

Silap pissusaa pillugu sammisaqarnermik atuartunik unammisitsinermik aaqqissuisuupput, Pinngortitaq pillugu nunarsuaq tamakkerlugu suliniaqatigiiffik Verdensnaturfonden, Codan, Elsparefonden aamma Politiken. Unammisitsinermi atuartut 6. klassimiit 10.klassimut atuartut silap pissusaata allanngoriartorneranik ilisimasaqalernissamut periarfissinneqarput.