Atuaqatigiit 8. klassit Bubber ilagalugu Tunumukassapput

Atuaqatigiit 8. klassit, Bogø Kostskolemeersut, Pinngortitaq pillugu nunarsuaq tamakkerlugu suliniaqatigiiffimmit WWF-imit suliffeqarfimmillu Codanimit, Danmarkimi atuaqatigiinni silap pissusaanik sammisaqarluarnerpaatut toqqarneqarput.
decembarip 05-at 2009 15:36

Taamaattumik tv-mik aallakaatitassiortartoq Bubber peqatigalugu Tunumut angalanissamik akissarsisinneqarput, angalanermilu siornatigut Siriusimi qimussimik nakkutilleeqataasimasoq Morten Hilmer issittumi qanoq inuuniartoqarsinnaaneranik ilinniartitsisussatut angalaqatigissavaat. Aviisimi Politikenimi taama allaaserinnittoqarpoq.

- Atuartut atugartuussuseq qimallugu inuuneq misilissavaat. Tunumi mittarfimmut mikkunik qimussinit 13-init aaneqassapput kingornatigullu sikumi aalisarniarluni qanoq alluliortoqartarnersoq ilinniassavaat, Gitte Hemmingsen WWF-imeersoq oqarpoq.

Atuaqatigiit katillugit 980-it 6. klassiniit 10.klassinut atuartuusut, silap pissusaanut tunngatillugu unamminermi peqataapput, matumani atuartut silap pissusaanut qanoq ilisimasaqartiginerat misilinneqarluni. Tamatuma saniatigut atuartut atuarfigisamik nukimmik atuinerata millisinnissaanut siunnersuusiortussaapput.

Bogø Kostskolemi atuartut ajugaanissartik naatsorsuutigisimanngikkaluarpaat.

- Tamanna tupaallaatigisorujussuuarput. Tusarlerneqaratta kikkut tamarmik nilliaannalerlutik imminnut eqitaartorsuanngorput, atuartut ilaat Kia Petersen Poltikenimut taama oqaluttuarpoq.