Atuaqatigiiaat marluk 2008-mi ataatsikkut anissapput

Meeqqat atuarfiinit anisussat 2008-mi peqatigiiaat marluusussaammata, iliniaqqiffigisinnaasaat amingaataalersinnaaneri, inatsisartuni ilaasortanit ernumagineqarpoq. Ilaatigut efterskoleni ilinniaqqiffissanik amerlanerusunik immikkut aningaasaliisoqarnissaanik ujartuisoqarpoq, ujartuisunullu ilaavoq Siumut sinnerlugu inatsisartuni ilaasortaq Ole Thorleifsen.

- Ajornartorsiut ungalassimaniarlugu, maannaminngaanniit piareersarnissaq aallartittariaqarpoq. Efterskolertussat sammineruakka, aningaasaliissutissammi taamaanginnartillugit piareersartoqarsinnaanngilaq. Una aamma ammaakkusullugu, 10.klassini 11.klassinilu atuartut efterskolertarnissaat ammaanneqassammat, aamma 2008-mi efterskolertussat piareersimaffigineqarniassammata, Ole Thorlefsen oqarpoq nangillunilu; - Naalakkersuisup akissuteqaataa paasisinnaalluarpara, aningaasanut inatsit malillugu sulimmat, kisianni uanga kissaatigaara inatsisartuni ataatsimiisitaliat peqatigalugit Naalakkersuisup sulinissaa, taamaalilluta ikorfartoqatigiilluta sulisinnaaniassagatta. Naalakkersuisoq kisimiilluni suliaqaraangami naammagittaalliortut amerlanerusarput, taamaammat suleqatigiinnissaq qilanaarnarpoq.

Taama oqarpoq, inatsisartuni ilaasortaq Ole Thorleifsen. ’

Demokraatit sinnerlugit inatsisartuni ilaasortaq Astrid Fleischer Rex aamma siunnersuuteqarpoq, ukiuni 2008-mi 2009-milu aningaasaliissutit amerlanerutinneqarnissaat.