Atualeqqinnissamut kommuunit ulappupput

Aammami aqqutaani IMAK-ip atorfinnut mattussinerata, atuarfiit sulisussarsiornissaat pakkersimaarpaa.

Atorfinnillu mattussisoqarnerup nalaani taamaammat kommunit ukiumut atuarfiusussamut ilinniartitsisussanik atorfinitsitsinissaat ajornarsimavoq.

Mattussinerlu qaangiuteriarmat kommunini maanna ulappupput. Tassami kommunini tamani ilinniartitsisussaaleqipput.

- Ukioq manna allagarsiinerput maajip qeqqani aatsaat naammassisussanngormat ulapittariaqassaqaagut, ukiup atuarfiusup naannginnerani ukiup tullissaani ilinniartitsisut qassit sumilu atorfinitsissinnaanerlugit suliniutigalugit, Kommune Kujallermi atuarfeqarfinni ulluinnarnilu paaqqinnittarfinnik ingerlatsivimmi pisortaq Jens Korneliussen oqarpoq, tassami atorfiit naliginnaasumik januaarimi inuttassarsiorneqartaraluartut nassuiaavoq.

Kommuneqarfik Sermersuup artuarfeqarnermut immikkoortortaani pisortap Hans Peter Brobergip ilinniartitsisunik katillugit 30-t missaannik atorfinitsitsissallutik naatsorsuutigaa, atorfinitsitsinissamut mattussinerup malitsigisaanik kommunimi sulisut ukiumi atuarfiusumi nutaami ilinniartitsisussanik pissarsiorlutik ulapinnerusimapput.

- Tassalu piffissamut killiliussaq eqqorniarsarisussaavarput suut tamarmik juunip 15-iutinnagu inissereersimasussaammata, Hans Peter Broberg oqarpoq.

Kommune Kujallermi taama aamma inissisimallutik Jens Korneliussen oqaluttuarpoq.

- Ukiunut allanut naleqqiullugu ulapaartorujussuusussaavugut. Imaanngikkaluarpoq taanna killiliunneqartartoq juunip 15-iat allanngormat, kisianni suliarisartakkavut toqqissisimanerulluta peqqissaarnerullutalu ingerlattarnikuusavut immaqa ukioq manna tuaviuunnerullugillu kukkunissatsinnullu periarfissaqarnerulluta ingerlattariaqassavavut, Jens Korneliussen oqarpoq.

Ukioq atuarfiusoq aallartippat ilinniartitsisut nutaat qassit kommuniminni pisariaqartissanerlugit taassuma suli oqaatigisinnaanngilaa.

Qaasuitsup Kommuniani ilinniartitsisut nutaat qassit ukioq atuarfiusumi nutaami pisariaqartinneqassanersut, Meeqqat, Kulturi Atuartitaanerlu pillugit Ingerlatsivimmi pisortap Hans Eriksenip aamma suli oqaatigisinnaanngilaa.

KNR-imulli oqaluttuarpoq, atorfininnissamut IMAK-ip mattussinera, kommuniminni atorfinnik inuttalersuinissamut malunniuteqarpallaarnavianngitsoq, mattussinerulli malitsigisaanik kommunini allanisulli ukioq atuarfiusup aallartinnginnerani ulapaarfioqisoq, oqaluttuarpoq.