Atuakkiullammammik toqqaasoqalerpoq
Nunat Avannaamioqatigiit atuakkiortunut nersornaasiuttagaanut innersuunneqartut aqqi ullumi saqqummiunneqarput.
Atuakkat aqqaneq-marluk nunanit avannarlerni tamanit – aamma Savalimmiunit Saaminillu – innersuussanut ilaapput, Kalaallilli Nunaanneersoqanngilaq. Nunat Avannaamioqatigiit atuakkiortunut nersornaasiuttagaat 2008-mi kimit pineqassanersoq, nalilersuisussat Stockholmimi februaarip ulluisa 29-anni ataatsimiilerunik eqqartussavaat.
Nersornaasiuttagaq 350.000 koruuninik aningaasartaqarpoq.
Hans Anthon Lynge, Kalaallit Atuakkiortut siulittaasuat oqarpoq, novembarip 20-ata tungaanut atuakkanik nunarput sinnerlugu innersuunneqartussatut misissuisitsisimagaluarlutik, ajoraluartumilli piukkunnartoqarsimanngitsoq.
- Atuakkiat nutaaliaasariaqanngillat. Atuakkat aamma tassaasinnaapput piviusunik takorluukkanilluunniit aallaavillit imaluunniit taallat. Atuakkat innersuunneqartut aamma tassaasarput, nunani avannarlermiut oqaasiinut nutsissallugit piukkunnarsinnaasut.
- Neriuuteqartuaannarpugut, arlaanni soqutiginarluinnartumik innersuussisinnaassaagut, Hans Anthon Lynge oqarpoq.
Innersuunneqartulli nunatsinneersortaqarput.
Naja Marie Aidt Danmarki sinnerlugu innersuunneqartoq Aasianni – danskinik angajoqqaaqarluni juulliaqqami 1963-imi inunngorpoq, arfineq-marlunnik ukioqarluni Danmarkimut nuunnerulluni. Kalaallit Nunaani inuunini toqqissisisimanartutut pilluarfittullu eqqaamajuaraa, atuakkiortut pillugit nittartakkani atuarneqarsinnaavoq.