Atuakkiortut pissangallutik nunat avannarliit nersornaasiuttagaannik tunniussisoqarnissaanut peqataajartorput
Politikerit nunanit avannarlerneersut Nunat Avannaamioqatigiit Siunnersuisooqatigiit ukiumoortumik ataatsimiinnissaannut peqataajartorlutik ulluni makkuni Oslomi katersuuteqqapput. Nunatsinnit Juliane Henningsen aamma Kim Kielsen aallartitaapput, aamma nunat avannarliit siuttui ataatsimiissimapput. Ukiormannalu nutaat Nunat Avannaamioqatigiit Siunnersuisoqatigiivisa nersornaasiineri aqagu unnukkut Oscarinik nersornaasiinertullusooq ingerlanneqartussaapput.
- Uannut pingaaruteqaqaaq, aamma innersuunneqarsimanera nuannaarutigeqaara. Suliamma maluginiarneqarsimanerat uannut pingaaruteqartupilussuuvoq, Nuka Godtfredsen nuannaarluni oqarpoq.
Taanna atuakkiortoq Martin Appelt peqatigalugu meeqqanut inuusuttunullu atuakkiortartunut nersornaammut nutaamut innersuunneqarsimapput, Nunatta qanga oqaluttuarisaanera pillugu titartakkanik oqaluttualiaat nangeqattaartoq tunngavigalugit. Martin Appeltilli nersornaammik tunineqarnissrtik ilimagivallaanngilaa.
- Ajugaassagaluarutta tupaallassaqaanga. Meeqqanut atuakkiortut pikkorinnerpaat ilaat unammivagut, ajugaassagaluaruttali Kalaallit Nunaannut oqaluttuarisaanerminik allaaserisaqartumut assut nuannaarutaassaqaaq, oqarpoq.
Atuakkiortoq Mariane Petersen Nunat Avannaamioqatigiit Siunnersuisooqatigiivisa atuakkiortumut nesornaasiuttagaanut aappassaanik innersuunneqarpoq. Peqquteqavissumilli nersornaasiinermut peqataanissaminut naaggaartariaqarsimavoq, taarsiullugulu atuakkamik saqqummersitsisuni Lene Therkildsen Milik Publishingimeersoq aallartissimavaa, ajugaassagaluaruni sinnerluni nersornaammik tigusisussanngorlugu. Lene Therkildsenilli aamma nassuerutigaa kalaallit atuakkiaat nunani avannarlerni allani atuakkiortarnikkut ileqqutoqqanut sakkortuumik unammillertut.
- Kalaallit Nunaanneersumik ajugaasoqassagaluarpat kalaallit atuakkiaasa ilisimasaqarfiginerulernissaannut tamanna annertuumik kivitseqataassaaq, oqarpoq.
Nuka Godtfredsenip, maannakkorpiaq nangeqattaartuliami immikkoortuisa pingajussaanik suliaqaleruttortup, nersornaat immikkoortut sisamaata, qallunaatsiaanut tunngasup, aningaasalersornissaanut atussagaluarpai.
- Taamaattoqassappat nuannarisannik suliaqarnissanut sivisunerusumik periarfissaqalissaanga. Kissaatiginerpaasarami tassaavoq - titartakkanik nangeqattaartuliortutut siunissami suliaqarnissama qularnaarnissaa, oqarpoq.
Nersornaatit Oslomi aqagu, Norgemi nalunaaqutaq malillugu unnukkut nal. 19.00 tunniunneqassapput.
