Atuakkiortut peqatigiillutik asanninnilersaarusiorput

Atuakkiortut atuakkanillu saqqummersitsisarfinneersut 25-t missaanniittut, Nunanit Avannarlerneersut, suleqatigiillutik asanninneq pillugu inuusuttunut oqaluttualiorlutik aallartipput.
Allattoq Lotte Holm
februaarip 10-at 2009 08:30

Atuakkiortut Savalimmiuni Tórshavnimi Nunat Avannaamioqatigiit Illuutaanni, sapaatip akunnerata kingulliup naanerani katersuupput, oqaluttualiatik eqqissillutik oqaloqatigiissutigalugit, pitsanngorsaatigineqarsinnaasullu aamma eqqartorlugit.

Nunani Avannarlerni atuakkanik saqqummersitsiviit arfineq-pingasut suleqatigiipput, oqaaseqarfiusunit aamma taama amerlatigisuneersut.

Kalaallit Nunaanniit peqataapput atuakkiortut Mâgssánguaq Qujaukitsoq aamma Erna Lynge, taavalu saqqummersitsivimmiit, Milik Publishingimiit, Lene Therkildsen aamma peqataalluni.

Nunat Avannarliit suleqatigiinnerat pissutaarpiarluni atuagaq ukiut pingasut matuma siorna saqqummersinneqarpoq, tassa Nunat Avannarlermiut qiiaammisaarnartuliaat, ”Aliortukkersaarutit”.