Atuakkiortut Nunarput pillugu atuakkiornissartik nuannaraat

Danskit naqiterisitsisarfii atuakkanik Kalaallit Nunaanni pisimasuutitanik saqummersitsisartut amerliartuinnarput. Atuakkiallu taakku nuannarineqartupilussuupput - Danmarkimi nunanilu allani.
Allattoq mlk, Simon Uldum
novembarip 12-at 2013 06:31

Upperisarsiornikkut eqeeriartulerneq nunasiaateqartumut Danmarkimut ulorianartorsiortitsivoq. Aatsitassanut pisortaqarfiup pisortaa toqunniarlugu sioorasaarneqarpoq. Sermermik ilisimatuut eqqumiitsumik toqquteqarput. Danskit atuakkiaat ukiormanna saqqummersut ilarpassui Kalaallit Nunaanni pisimasuutinneqarput. Kalaallit Nunaatalu piffissami matumani oqallisaasupilussuunerata tamanna malitsigigaa, naqiterisitsisartoq Jenny Thor, Gyldendal Group Agencymi pisortaq, atuakkiat ilarpassuinik saqqummersitsisuusoq oqarpoq.

- Kalaallit Nunaat maannakkorpiaq sammineqartupilussuuvoq. Aammali oqaluttuarpassuit suli oqaluttuarineqanngitsut amerlasuupilussuupput. Taamaammat saqqummersartut qujamasuutiginaqaat.

Pissangartulianik atuakkiortartut, soorlu Leif Davidsen aamma Helle Vincentz, pinerluttunillu atuakkiortartut Robert Zola Christensen, Lotte aamma Søren Hammer kiisalu atuakkiortut Nunatsinnut attuumassuteqartut Kim Leine aamma Iben Mondrup, atuakkiatik ukiormanna saqqummersut Nunatsinni pisimasuutippaat. Atuakkallu Kalaallit Nunaannut tunngasut tunisaalluartarput, Jenny Thor oqarpoq.

- Danmarkimi, aammali nunani tamalaani tunisaalluarput, takornartatut alutornatutullu, ilisimasaqarfigivallaanngisatullu isigineqartarunaramik. Danmarkimik Kalaallit Nunaannillu akuleriissitsilluni atuakkiortarneq pitsaalluinnartuusoraara, allaanerummat peqatigisaanillu danskinut naleqqiullugu allaanerusumik pissuseqaneq pissanganarineqartarmat, oqarpoq.

Nunatsinni naqiterisitsisarfiup Atuagkat taamatut ineriartortoqarnera aamma maluginiarsimavaa, naqiterisitsisartoq Inger Hauge oqarpoq.

- Kim Leinemit aallaaveqarsoraara. Taannami suliaminik iluatsitsilluarsimavoq. Tamannalu sunniuteqartarpoq, atuakkiortullu allat eqqarsalersarlutik: Uanga aamma taamaaliorusuppunga, aamma uanga Kalaallit Nunaat misigisaqarfiginikuuara.

Lene Therkildsen Milik Publishingimeersoq isumaqarpoq aatsaat aallarteruttortoqartoq.

- Amerliartuinnassasoraakka. Kalaallit Nunaat sammineqaleriartuinnartillugu atuakkiornermi Kalaallit Nunaat aamma sammineqarneruleriartuinnassaaq, aamma neriunnarpoq atuakkiortortavut siammasinnerusumik sammisaqarlutik atuakkiortalerumaartut, oqarpoq.

Sapaatit akunnerata siuliup naanerani Danmarkimi atuakkanik saqqummersitsivik Københavnimi Bella Centerimi ingerlanneqarpoq, Nunatsinnilu atuakkanik naqiterisitsisarfiit marluusut tamarmik peqataapput.