Atuakkiortut atuarfiat pilersikkusuppaat
Nunatsinni atuakkiortut peqatigiiffiata Nunatsinni atuakkiortunut atuarfeqalernissaanik kissaateqarnerat, Kultooreqarnermut naalakkersuisup Henriette Rasmussen-ip tapersersorpaa.
- Kalaallit Nunaanni atuakkiortut peqatigiiffiata ataatsimeeqatigerusullunga nalunaarmata ataatsimeeqatigisimavakka, soqutiginarluinnartumillu ataatsimeeqatigeereerluta, atuakkiortut atuarfiannik pilersitsinissamik suleqataanissaq siunniuppara, Henriette Rasmussen oqarpoq, nangillunilu; - Atuakkiortut atuarfiannik peqalernissaq pisariaqartipparput, aamma oqaatsitta pitsaanerusumik atorneqarnissaa pisariaqarpoq.
Kultooreqarnermut Naalakkersuisoq Henriette Rasmussen aamma oqarpoq atuakkiortut atuarfiannik pilersitsinissamut aningaasartuutissanut aningaasaqarnermut inatsisissamut siunnersuuteqassamaarluni.
Atuakkiortut atuarfissaat pilersinneqarpat atuakkiortunuinnaanngitsoq ulluinnarnili kalaallit oqaasiinik atuisunut, soorlu palasit politikerit tusagassiortullu atuakkiornermik atuarfimmik atuisuussasut aamma oqaatigineqarpoq.
