Atuakkiortumut nersornaatip 70 procentia kalaallit pigaat

Atuakkiortup Kim Leinep atuakkiortungorneranut Kalaallit Nunaat pissutaaqataalluinnarpoq. Nunat Avannaamioqatigiit Siunnersuisoqatigiivisa atuakkiortumut nersornaataanik tunineqartoq KNR-imut ullumi taama oqarpoq.
Allattoq mlk, Simon Uldum
oktobarip 31-at 2013 11:45

- Kalaallit Nunaanniissimanngittuuguma taama angusaqarsimatigissanngikkaluarpunga.

Kim Leine ilaatigut Tunumi ukiuni 15-ini peqqissaasutut sulisimavoq.

- Atuakkiorneq Kalaallit Nunaanniillunga ilikkarpara, Kulusummiinninni atuakkiortutut imminut ilinniartippunga. Ukiuni tallimani Kulusummiinnera nuannersupilussuuvoq eqqissisimanarlunilu, tassanilu atuakkiortutut sungiusarpunga. Tassani najuaqarlunga atuakkiorneq ilikkarpara.

Kalaallit Nunaallumi atuakkiamini uteqqiattumik sammisarpaa. Atuakkiaa kingulleq 'Profeterne i Evighedsfjorden' Kalaallit Nunaannut ajoqersuiartortitsineq pillugu atuakkiassaasa pingasut siulleraat. Aamma Nunatsinni nalitsinni pisut pillugit atuakkiornissani takorloortarpaa.

- Oqartarpunga 100 procentimik norgemiuullunga, 100 procentimik danskiullunga 70 procentimillu kalaaliullunga. Naluara imminut kalaaliunerarsinnaatitaanerlunga, kisianni kalaaliorusoqaanga.

Naak Kalaallit Nunaat Nunat Avannaamioqatigiit Siunnersuisoqatigiivisa atuakkiortumut nersornaataanik tunineqarsimanngikkaluartoq, atuakkiortumik danskimik Nunatsinni sorlaqarfeqartumik aappassaanik nersornaasiisoqarpoq. Naja Marie Aidtimi 2008-mi nersornaatisisuuvoq, taannalu Aasianni peroriartorsimavoq, atuakkiortunngorsimanerminullu aamma taassuma Nunarput pissutaaqataatippaa.

Kim Leine Nunat Avannaamioqatigiit Siunnersuisoqatigiivisa atuakkiortumut nersornaataanik tunineqarnermi saniatigut aamma atuakkiaminut 'Profeterne i Evighedsfjordenimut' Politikenip atuakkiortumut nersornaataanik aammalu De Gyldne Laurbærinik nersornaatisisimavoq.