Atuakkiortoq Tine Bryld nersorniarneqarpoq
Danmarkimi atuakkiortut akissarsitinneqarneranni 2005-imoortumi nunatsinnut tunngasunik atuakkiortartoq, atuakkiortoq Tine Bryld 30.000 koruuninik akissarsitinneqarpoq.
- Taama nersorniarneqarnera ataqqinaatitut tiguara, immikkulli nuannaarutiginerpaavara Kalaallit Nunaannut tunngasut atuakkiakka nersorniarneqaatigigakkit. Tassami atuakkat taakku uannut inuttut takussutissiipput, Tine Bryld radio aviisimut taama oqarpoq.
Taanna nangilluni nassuiaavoq, nammineq paasinneriaatsiminut atuakkiornini tamakku allannguisimaqisut, Kalaallit Nunaanut tunngasuinnaanngitsunik aammali nammineq inuttut pissarsiaqaatigisimaqigini.
Inuullunga paasilerpara kulturimullu akuullunga, misigissuserlu uannut eqqumiinnerpaaq misigisara unaavoq: marloqiusatut inissisimaneq misigalugu, kalaaliullunga danskiullungaluunniit ataqqineqarnerpaajunngikkaluarlunga kisiannilu ataqqinassuseqarlunga.
Kalaallit Nunaanneeqqaarama soorlumi kinaassusera illikartinneqartoq, tassami uku inuit ilagigakkit, danskiunngitsutut isigisakka kisiannilu aamma inuit Danmarkimut attuumassuteqarlutik.
Ilaasa danskit ajorigaat, ilaallu imminnut ajoralutik, soqutiginartualu unaavoq; kinaassuseq taanna oqaatsinut qileruteqartutut immat. Taavalu nammineq inuunermut nunamullu akisussaaffeqarpalaarnermik aamma ilaqarluni, tamannalu uannut eqqarsalersitsisuuvoq, Tine Bryld taama oqarpoq.
Taanna nangilluni nassuiaavoq, inuppassuit kalaallit nipaannerartaraat nipaallutik pisarmata.
- Assigiinnnarpaa Danmarkimi illoqarfeeqqanut pilluni, aamma tamakkunani inuit nipaarluusarput. Kisiannili inuk ammut isiginiarsarinagu ataqqilluguli pigaanni sunaluunniit oqaluuserineqarsinnaalertarpoq. Uangalu kalaallit inuusuttuniit utoqqarnut oqaloqatiginiartillugit ajornartorsiutiginngisaannarpakka, Tine Bryld oqarpoq.
