Atuakkiortoq Per Petterson nersornaaserneqassaaq
Nunat Avannarliit Siunnersuisoqatigiiffiata atuakkiortumut nersornaasiuttagaa atuakkiortumut Per Pettersonimut, Norgimeersumut, ukioq manna tunniunneqassaaq.
Allattoq Mads Lynge
apriilip 03-at 2009 11:12
Per Pettersonip atuakkiaa ”Jeg forbanner tidens elv” nersornaasiinermut tunuliaqutaavoq.
Pettersonip oqaasilerillaqqinnera Nunat Avannarliit Siunnersuisoqatigiiffiannit nersorniarneqarpoq:
- Ajornartorsiutit inuunermi aqqusaartarsimasani atuakkiortup oqaluttuarai. Petterson taalliornerpalaartumik oqaluttuarpoq, oqaatiginiakkallu pisariaqartitat ilaatigut ajornakusoorsinnanerat Per Pettersonip ersersippaa, Nunat Avannarliit Siunnersuisoqatgiiffiata nersornaasiinissamut naliliisartuisa oqaatigaat.
Per Petterson, 57-inik ukioqartoq, ukiaru nersornaatisissaaq, nersornaaserneqarnermilu saniatigut 350.000 koruuninik tunineqassalluni.
