Atuakkiortoq Oqaasileriffimmi pisortanngortoq

Meeqqanut atuakkiortup, timersortartup taalliortullu Katti Frederiksenip Oqaasileriffimmi siullertut pisortaasimasoq Carl Christian Olsen, 2014-ip naanerani soraarninngortoq, juunip aallaqqaataannit atuutilersumik taarserpaa.

Ilinniartitaanermut, Kultureqarnermut, Ilisimatusarnermut Ilageeqarnermullu Naalakkersuisoqarfik tusagassiuutinut taama nalunaaruteqarpoq.

Katti Frederiksen Narsami inunngorlunilu peroriartorpoq, pingasunik meeraqarluni, Klaus Møllerilu uigalugu. Katti ilinniarluarsimasuuvoq, inuussutissarsiornermilu misilittagaqarluarluni.

Katti Frederiksen Ilisimatusarfimmi Oqaasilerinermi, Atuakkialerinermi Tusagassiuutilerinermilu ilinniagartuutut cand. mag.-itut 2011-imi naammassivoq, tamatumalu saniatigut University of Fairbanksimi Alaskamiittumi semesteri ataaseq ilinniarsimalluni. Ilinniagartuutullu ilinniagaqarnermi saniatigut aamma Nordisk Sprogkoordinationimi Dansk Sprognævnip allattoqarfiani  paarlaasseqatigiinnermik aaqqissuussinermi ilinniariartorsimalluni ilisimatusarsimallunilu, tassanilu Nunani Avannarlerni oqaasilerinermi suleriaatsinik sulianillu pingaartitanik suliaqarsimalluni.

Katti Frederiksen nunarsuarmioqatigiinni ingerlatsinermut misilittakkani tunngavigalugit, aammalu ilinniagartuutut tunuliaqutarisani aallaavigalugit, oqaatsitta avammut sinniisuuffiginissaannut piginnaaneqarluarpoq.



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl