Atuakkiortoq kinamitaava nersornaatisissava?
Ilinniartitsisoq atuakkiortorlu Kristian Aaju Olsen, Nunatsinnit nersornaasigassatut innersuussutigineqarpoq.
Taassuma atuakkiaa pinerluttulersaarut Kakiorneqaqatigiit tunngavigalugu innersuussutigineqarpoq. Kalaallit Atuakkiortut siulittaasuata Hans Anthon Lyngep atuakkiaq taavaa "soqutiginartumik tulleriinnilersugaalluni oqaluttualiallu imaa eqqarsaatigilluagaalluni, allamut sangusaqattaarani paasiuminaatsunillu paasiniaaqqissarnernik imaqarani" atuakkiaasoq.
Taamaattorli Kristian Aaju Olsen nersornaasigassatut piukkunneqarnerpaanut ilaanngilaq, ilimagineqarnerpaasorli tassaalluni Norgemiu atuakkiortoq Beate Grimsrud. Taanna immikkut ittumik nunanit marlunnit nersornaasigassatut ataatsikkut innersuussutigineqarpoq - tassa Norgemit Sverigemillu. Beate Grimsrud Norgemiuuvoq, Sverigemili najugaqarluni, atuakkianilu Norskisut Svenskisullu saqqummersittarlugit.