Atuakkiortoq: Kalaallit sumiginnarneqarsimapput

Atuagaq isornartorsiuerpalaartumik taamaattorlu Kalaallit Nunaannut nuannarinnippalaartumik allataq. Qallunaap atuakkiortup tusagassiortullu Jan Cortzenip atuakkiaa "Polarparadiset", taama nalilerneqarpoq.
Allattoq Jaaku Lyberth
novembarip 20-at 2010 14:26

Kalaallit Nunaat Kalaallillu Nunaanni inuiaqatigiit pillugit atuakkiaq 458-inik qupperneqarpoq.

- Ilinniagaqarneq Kalaallit Nunaata siunissaanut aalajangiisuulluinnarpoq. Ilinniagaqarneq pingaarnerutillugu inuiaqatigiinni suliniutigineqanngippat, issittumi inuiaqatigiit inuusut iluatsinnavianngillat, Jan Cortzen nutaarsiassaqartitsivimmit ritzaumit apersorneqarluni taama oqarpoq.

Kalaallit Nunaanni ilinniagaqartut naammannginnerat Jan Cortzenip aalassassutigaa.

- Kalaallit Nunaanni innuttaasut affaat, tassa 50 procentii, ilinniagaqanngillat, taamaanneralu pissutigalugu Kalaallit Nunaat ingerlariaqqinnissaminut ajornartorsiussaaq. Innuttaasut atuartussaatitaanermut piumasaqaataasoq pisimanngilaat tamannalu alianarpoq, atuakkiortoq erseqqissaavoq.

Inuiaqatigiit ilinniagalinnik naammattunik sulisussaqanngitsut sorussussuteerutissapput, Cortzen oqarpoq.

Inuiaqatigiit ilinniagalinnik naammattunik peqannginnerat politikkikkut aqutsisunut akisussaaffiuvoq annertooq, tamannalu iluatsissimanngitsoq atuakkiortoq isumaqarpoq.

- Kalaallit politikerinut piumasaqarsimanngillat, pissutsit taamatut innerat naammagiinnarsimavaat, sumiginnarneqarlutillu Cortzen oqarpoq.

- Inuussutissarsiutit pillugit tusagassiortutut oqassaguma Kalaallit Nunaanni suliffeqarfiit angiisut qallunaanit pisortaqarnerat ingasappoq.

Pisortat suliffeqarfiutaanni aqutsisut qallunaat, Kalaallit Nunaanni najugaqaratik, Nuummut Danmarkimullu uteqattaarlutik sulisarnerat Cortzenip aamma isornartorsiorpaa.

Suliffeqarfissuup Royal Greenlandip ingerlanneqarnera aningaasatigullu annaasaqaatai annertuut pillugit politikkikkut akuleruttoqarnera Cortzenip tupigusuutigaa.

Siunnersortit nalunaarusiarpassuarnik suliaqartut, suliassanik allaaserisaqartut, nalilersuisartut, aningaasarsiornikkullu misissuisitarpassuit, Kalaallit Nunaanni atorneqarnerat Cortzenip tupigusuutaasa ilagaat, nunanimi allani siunnersortinik taamak atuitigisunik ilisimasaqarani Cortzen oqarpoq.

Danmarkimit ataatsimoortumik tapiissutit 3,2 milliardit koruuniusut qaavatigut siunnersortinik atuinerujussuaq ingasagalugu Jan Cortzen oqarpoq.