Atuakkiortoq COP16-mut peqataajartorpoq

Kalaaleq atuakkiortoq isiginnaagassiortartorlu, Lana Hansen, Mexicomi COP16-ertoqarnerani Kalaallit Nunaat pillugu oqalugiassaaq.
decembarip 02-at 2010 13:08

Lana Hansen Mexicoliarluni ullumi aallassaaq.

- Ulluinnarni inuit misigisaat inunnut allanut oqaluttuarissallugit pingaaruteqarpoq, tamannalu Mexicomiinniinni oqaluttuarerusuppara, Lana Hansen oqarpoq.

Lana Hansenip oqalugiarnermini pingaarnertut oqaluttuarissavaa, silap allanngoriartornera Kalaallit Nunaannut qanoq sunniuteqassanersoq. Mexicomiinninilu iluatsillugu atuakkiani kingulleq "Sila" ilisaritissallugu, aamma isiginnaagassialiani naatsoq, Ego White Off iluatsillugu takuteqattaassallugu. Atuagaq isiginnaagassiarlu tamarmik silap pissusaanut tunngasuupput.

- Silap pissusaa pillugu politikikkut oqallinnerit pingaaruteqaraluarput. Puigugassaanngitsorli unaavoq, oqaluttuarissallugu silap pissusaanik eqqugaasut tassaammata inuinnaat, Lana Hansen oqarpoq, nangillunilu:

- Oqariartuutissatut pingaarnerpaavoq oqaluttuarissallugu Kalaallit Nunaanni silap pissusaata allanngorsiartornerata inuinnarnut aammalumi avatangiisinut ullutsinni qanoq allanngortitsitiginersoq. Aamma oqaluttuarerusuppara silap allanngoriartornerata kigaallatsinneqarnissaa qanoq pingaaruteqartigisoq inuiaqatigiinnut taama ikitsigisunut, Lana Hansen oqarpoq.

Mexicop ilinniartitaanermut ministereqarfiata Lana Hansen qaaqqusimavaa, angalanera Det danske Kunst- og Litteraturrådemit akilerneqassalluni.