Atuakkiorneq nunatsinni pitsaanerusariaqarpoq

Nunat Avannarliit Siunnersuisoqatigiiffiata atuakkiortumut akissarsiaritittagaa Islandermiumut Sjónimut ukioq-manna tunniunneqarpoq.

Nunatsinninngaanniit atuakkiortumik akissarsisinnaasumik innersuussisoqanngilaq.

Atuakkiortut peqatigiiffiata siulittaasua Arkaluk Lyngep Islandermiut unamminernut peqataajuartarnerannut pissutaanerarpaa Islandermiut nunanut allanut naleqqiullugit atuakkanik atuarnerpaagamik, immikkullu atuagaateqartariaqarneq kultureqarfigigamikku.

Islandi naalagaaffiuvoq, nunartillu namminneq aqullugu, allaniillu naqisimaneqannginnami tamaalillutillu aalajangiisinnaassuseqarlutik.

Nunatsinni taamaattoqanngimmat qaangerniagassat arlaqarnerarpai, soorlu nunasiaanermi eqqarsariaatsit kaanngarsimannginnerarpai. Nunatsinnili atuakkiornermut atuakkialerinermullu periarfissaqarnerarpaa. Inuit atuartaraluartut, suli amerlanerusinnanerarpai, GU-milu kalaallisut atuartitsineq ilaqutaasinnaanerarpaa, atuarsinnaanermik pilersitsisinnaagami.

Arkaluk Lynge aamma oqarpoq, sorsugassat ilagigaat atuakkiornerup nunatsinni ajornannginnerulernissaa. Naalakkersuisut soorlu Atuakkiorfimmut ajornartorsiutit iliuuseqarfigisariaqaraat.

Nunat Avannarliit Siunnersuisoqatigiiffiata unammisitsisarneranut nunarput peqataajuartariaqarnerarpaartaaq.