Atuakkiorfiup tuniniarneqarnera nalorninarsivoq
Namminersornerullutik Oqartussani atorfillip Atuakkiorfimmik tuniniaasut piserusuttorlu oqaluttuussimavai Namminersornerullutik Oqartussat atuakkanik naqiterisitsisarfimmik pilersitsilersaartut. Taamaattoqarniarpat piserusuttoq pisinissamut soqutiginnikkunnaarniarpoq.
Atuakkiorfimmik pisisussap atuakkat naqiterneqartigatik aaqqissortalerusullugit neqerooruteqarluni nalunaarneratigut suna tamarmi qulakkeerneqartutut isikkoqarpoq, Pisinissamullu atatillugu isumaqatigiinniarnerup nalaani atorfillip nalunaarutigisimavaa Namminersornerullutik Oqartussat naqiterisitsisarfimmik pilersitsiniartut.
Taama oqarpoq atuakkiorfimmik piserusuttoq sinnerlugu Ove Karl Berthelsen, siunnersuisarfimmeersoq Toornaq Consulting Aps.
Namminersornerullutik Oqartussat naqiterisitsisarfiliorniarneranik atorfiliup oqarsimaneranik uppernarsaavoq Atuakkiorfiup naqiteriviullu siulersuisuini siulittaasoq Knud Lund Olsen.
Knud Lund Olsenip aamma uppernarsarpaa siunnersuisuarfiup Toornaq Consulting Aps-ip Atuakkiorfiup naatsorsuutai kingulliit aalajannginnginnerminni misissuataaraat.
Toornamiillu soqutigaat atuakkiorfiup suliarisimasai ingerlateqqissallugit, siunnersuisiarfiup pisiniarnerminut ullualunnguit qaangiuppata akissuteqarnissani naatsiorsuutigaa.
Kultureqarnermut naalakkersuisoq angalammat oqaaseqartissinnaasimanngilarput, Naalakkersuisullu siulittaasuat Hans Enoksen pisinermut atatillugu atorfilittaminit ilisimatinneqartigani oqaaseqarusunngilaq.
