Atuakkiorfik tunineqarpoq
Atuakkiorfik tunineqarpoq, suliffeqarfimmillu juunip aallaqqaataanit tigusisussaq tassaavoq, Toornaq Consulting. Atuakkiorfimmi sulisut pingasut sulinertik ingerlatiinnassagaat, Toornaq Consultingip erseqqissaatigaa.
Toornaq Consultingimi siulittaasoq Nukaaraq Eugenius qanoq akiliisimanerminnik oqaaseqarumanngilaq, Atuakkiorfiulli lageria illutaalu ilanngullugit pisiarisimallugit erseqqissaatigaa.
Atuakkiorfiup Namminersornerullutik Oqartussanut kiffartuussinermik isumaqatigiissutaa 900.000 koruuninik aningaasartalik ukiup naanissaanut tigummiinnassavaa, taamanikkussamulli isumaqatigiinniutigineqassaaq.
Atuakkiorfiup ukioq manna amigartoornissaa Toornaq Consultingimi siulittaasup naatsorsuutigaa, siunissamili sinneqartoortalernissaa anguniarneqarnerarlugu.
Atuakkiorfimmik namminersortunngorsaanissamik Inatsisartut aalajangertuupput. Atuakkiorfiup kalaallisut atuakkianik saqqummersitsinissaq suliaraa, atuakkanillu saqqummersitsisarnermut politikki eqqarsaatigalugu Atuakkiorfiup tunineqarnissaa atuakkiortut ataasiarnatik ernumagalugu oqaatigisarsimavaat.
Aamma Kulturimut naalakkersuisoq Henriette Rasmussen ernumalluni oqaaseqartarsimavoq, Inatsisartullu aalajangernerannut akerliusimallugu erseqqissaatigisimallugu. Kalaallisut atuakkianik tuniniaaneq sinneqartooruteqarluni ingerlasinnaanngitsoq oqarsimavoq, niuernerpalaartumillu ingerlatsineq akilersinnaanavianngitsoq oqarsimalluni.