Atuakkiorfik tapiissuteqarani ingerlasinnaanngilaq
Atuakkiorfik qaammat kingulleq tunineqarpoq, ippassarlu junip aallaqqaataani pisisut Toornaq Consulting-ip Atuakkiorfik tiguaat. Namminersornerullutilli Oqartussanit kiffartuussinermik tapiissutit unitsinneqassappata, nunatsinni kalaallisuunik atuakkanik saqqummersitsisarneq annikillerujussuarsinnaavoq pisisut oqarput.
-Atuakkiorfiup siunertarivaa atuakkanik kalaallisuunik saqqummersitsisarnissaq, atuakkallu kalaallisuut ilisimaneqarnerat siammarsarneqarnissaat tamannalu siunertaq allanngortinnianngilarput. Ineriartornerup takutissinnaappagu ilumut Atuakkiorfik qummut ingerlalersinnaasoq taava unitsinnavianngilarput. Tassanili apeqqutaangaatsiarpoq Namminersornerullutik Oqartussaninngaanniit kiffartuussinissamut isumaqatigiissut aamma aappaagumut aappaaguagumullu isumaqatigiissutigineqaqqinnissaat, Nukaaraq Eugenius Toornaq Consulting-imi Atuakkiorfimmik pisiarinneqataasoq oqarpoq.
Atuakkiorfik nunatsinni atuakkanik 1956-mili saqqummersitsisarpoq. 80-kkunnilu ingerlalluarnerpaasimalluni. Ukiuni kingullerni saqqummersitsisarnera annikilliartuinnarsimavoq, Atuakkiorfilli Namminersornerullutik Oqartussanit kiffartuussinermut tapiissuteqartarnini pillugu ukiumut atuakkat qulit 15-nillu akornanni saqqummersittarsimavai.
Atuakkiorfillu namminersortunit pisiarineqarnermini aappaagumut Namminersornerullutik Oqartussat kiffartuussinermut tapiissutinik isumaqatiginninniartussanngorpoq, kalaallisuunilli atuakkanik pisisartut ikippallaarneri pissutigalugit tapiissuteqarani ingerlaneq ajunnakusoorsinnaavoq.
-Akilersinnaanngilaq taperneqartanngikkuni, taanna ukiuni makkunani ersarissigaluttuinnarnikuuvoq. Pingaartumik kalaallit atuarusussusaat qaffakkiartortinnagu. Taamaammanuna kalaallisut atuakkanik pitsaasunik saqqummersitsisarneq appariartortinnagu qaffakkiartortilernissaa pingaaruteqartoq, uagullu suleqataarusuppugut, Nukaaraq Eugenius oqarpoq.
Ilinniusiorfik suleqatigerusullugu aamma kissaatigineqaraluarpoq.
-Ilinniusiorfik naqiterisitsisarfiuvoq amerlanerpaarpaanik atuartartulik, atuarfeqarfik kisimiillutik sullippaat, Namminersornerullutillu Oqartussanit kisimi pigineqarluni. Naqiterisarfittut namminersortutut isigissagaanni taakku pilerinarnerpaagaluarput ilinniutit saqqummersittassallugit. Kisianni massakkutut itsillugu ilimanarpallaanngilaq uagut ilinniutinik saqqummersitsisarnissatsinnik periarfissinneqarnissarput. Massakkut Ilinniusiorfik Atuakkiorfik A/S-imi najugaqarpoq, kisianni tusakkagut malillugit septemberip aallaqqaataani nuutsinnianeqartut tusarparput, Nukaaraq Eugenius naggasiivoq.
