Atuakkiaq pilernguppaat

Atuakkiaq ”Da Vinci Mysteriet” nunarsuarmi atuakkiani tunisaanerpaanut ilaasoq pillugu eqqartuussivilersuussineq ullumikkut aallartinneqarpoq.

Nunarsuaq tamakkerlugu tusaamaneqartumut atuakkamut ”Da Vinci Mysteriet”-mut atuakkiortoq, Dan Brown, Tuluit Nunaanni angutit marluk isumassarsiaannik tillissimasutut eqqarsuussivilersuunneqarpoq.

Londonimi eqqartuussineq ullumi aallartippoq. Michael Baigentip Richard Leighillu atuakkiorfitsik Random House eqqartuussivilersuuppat, Dan Brownip atuakkiaanut pissanganartuliamut namminneq atuakkiartik ”Det hellige blod og den hellige gral” 1982-imeersoq isumassarsiorfittut atortissimammagu.

Brownip atuakkiaa USA-mi 2003-imi saqqummersoq oqaatsinut 44-nut nutserneqarsimasoq, manna tikillugu 30 millioninngorluni tunineqarsimavoq. Ukiumut 493 million koruuninik Dan Brownip atuakkiani iluannarutigisimavaa, taamaalillunilu atuakkiortunit nunarsuarmi pisuujunerpaanut ilanngussimalluni.

Michael Baigent Richard Leighilu eqqartuussivimmi ajugaassagunik Dan Brownip atuakkiaanik atuakkiorfik naqiteqqissinnaajunnaarsissavaat atuakkiaatalu ”Da Vinci Mysteriet”-ip filmiliarineqarnerata maajip 19-ani Tuluit Nunaanni takuteqqaarneqarnissaa unitsissinnaallugu.