Atuakkiaq nutaaq

Atuagaq kalaallisut qallunaatullu naqitaq ullumi saqqummerpoq. Suiaassuseq persuttaasarnerlu pillugit nunatsinni 2002 mi isumasioqataasut 13 –it assigiinngitsunik tunulequtaqarlutillu atorfillit atuakkamik saqqummerseqataapput.

Saqqummersitsisuuvoq Allaffissornermi ilinniagartooq Mariekathrine Poppel. Immikkuullarissut 4-at atuakkami sammineqarsimapput. Ilaqutariinni persuttaasarneq, inooqatigiinnikkut, kulturikkut aningaasaqarnikkullu allanngoriartorneq, ingerlatsinikkut inatsisinullu tunngasut kiisalu persuttaasarnerup pitsaaliornissaa.

-Tassani anguniagaavoq kinguaariinni assigiinngitsuni persuttaasarnerup paasiniarneqarnissaa nassuiarneqarnissaalu taavalu aamma persuttaasarnerup pitsaaliorneqarnissaanut sakkussanik tunisinissaq, Mariekathrine Poppel oqarpoq.

Inuiaqatigiit inuttut kulturikkullu atuagaat nunatsinni allanngoriartorneranut nakuusertarnerup ilaatigut tunulequtaasarnera oqaatigaa. Tassa arnat angutillu pisussaaffiisa killingi isiginiarneqarunnaariartornerat ilutigalugu ilaatigut ilaqutariinni nakuusertoqartarmat. Aammalu oqaluttuarisaaanermi persuttaasarnerni ilisimasat misisuiffigisimavai.

-Tassani uanga sammisimavakka angutit atugarisimasaat. Nunasiaataalernermi angutit naqinneqaraangamik qanoq ilioriarfissaarullutik angerlarsimaffimminni arnat oqarutta aqukkuminaatsut akerliullutik inissisimasut persuttarneqartarnerannut nassuiaatit uanga suliarisimavakka.

Oqarsinnaagunarpugut angutit arnanik aqutsiniarnerat ullumikkumut suli atuuppoq.