Atuakkiamut nersornaasiuttakkamut Nunatsinnit innersuunneqartoq aana
Nersornaammut ataqqinaataasumut, Nunat avannarliit Siunnersuisoqatigiivinit tunniunneqartartumut, peqatigiiffik Kalaallit Atuakkiortut "Zombiet Nunaannik" innersuussisuuvoq.
Atuagaq oqaluttuaaqqanik qulinik imaqarpoq, peqatigiiffillu Kalaallit Atuakkiortut innersuussinermini ilaatigut ima tunngavilersuivoq:
"Sumiginnagaalluni imigassamillu ajornartorsiorfiujusumi alliartornerup kingunerisaanik misigissutsit sakkortoorsuit pilersinneqartarnerinut atuakkakkut Zombiet Nunaat-igut silarsuarmut allarluinnarmut isertinneqarpugut. Misigissutsit arlaannaalluunniit puiorneqarsimanngilaq, qaratsamilu teqeqqunut taartunut tamanut apuussorneqarpugut, angajoqqaat imigassamik atornerluisut imminnullu naalagarsuanngortittartut meerannguup qarasaani misigissutsinut pilersittagaanut. Oqaluttuaaqqat novellet qulit sinaakkutaralugit tamakku oqaluttuarineqarput, allalluakkani, kamminnertalinni,nukillalaarfiusuni, ilaatigullu ima eqqortigisuni, allaat angerlarsimaffimmi ulluni amerlasuuni erngutereersimanerup tipersua merianngunartoq naamaneqarsinnaallunilusooq. Meeraq zombiitut pissusilersulertarpoq, zombiit nunaat iserfigalugu. Takunnissinnaassutsili pigiuartarpaa."
Aamma atuaruk Piffissaq nutaaq - nipit nutaat
"Silarsuarmi piviusuni misigisimasani atorlugit oqaluttualianngortitsisinnaaneq, assigiinngitsunik inuttalersuilluni, immini eqqumiitsulioriaasivoq immikkuullarissoq, atuakkiortup Sørine Steenholtip kakkaffigisaa. Atuakkiaqqaamigut qulaajarpai pissutsit avaanngunartut inuiaqatigiinni tujorminartumik attanneqartut, ersersillugulu inuiaqatigiinni meeqqap avatangiisai akisussaaffimmik tigusinaveersaarlutik qanoq iliuuseqaratik susoqarsimasuusaaginnartitsisinnaanngitsut. Angajoqqaat suliassaq taanna saperpassut, inuiaqatigiit suliassaq tigusariaqarpaat. Tamakku eqqoqqissaarsimavai allaaserilluarsimallugillu."
Sørine Steenholdt Paamiuni 1986-imi inunngorpoq. Oqaluttualiaaqqanik unammisitsinermi "Allatta!"-mi 2012-imi ajugaasut ilagivaat.
"Zombiet Nunaat" atuakkiortup kisimiilluni saqqummersitaasa siullersaraat.
Nunanut namminersortoqarfiusunut nersornaat suli tunniunneqarnikuunngilaq
Nunat avannarliit atuakkianut nersornaasiuttagaat ataqqinaataasoq Nunat avannarliit Siunnersuisoqatigiivinit tunniunneqartarpoq. Ukioq kingulleq Jon Fossep norgemiup atuakkiaa nersornaaserneqarpoq.
Nunanit avannarlernit atuakkiat allat 14-it saniatigut oqaluttualiaaqqat katersat kalaallisut allakkat innersuunneqarput, innersuunneqartut allat ilagaat Finlandip namminersortoqarfianit Ålandimiumit atuakkiaq, saaminiillu taallanik katersat innersuunneqartut.
Nunani avannarlerni nunani namminersortoqarfiusunut minninernut arlaannut nersornaasiuttagaq tunniunneqassanersoq paasinarsiumaarpoq. Taamattoqassappallu aatsaat siullermik tamanna pissaaq. Kim Leinelli atuakkiaa "Profeterne fra Evighedsfjorden" 2013-imi nersornaaserneqartoq, qallunaatut, kalaallisut norskisullu atuakkiatut taaneqarsinnaasoq, Juaaka Lyberth Kalaallit Atuakkiortuni siulittaasoq oqarpoq.
