Atuakkiaaqqatut aallartippoq

Atuakkiorniarluni suliniut aallartikkami maanna Upernavimmi nuannannremik kinguneqarpoq. Taama pisoqarneranut tunulequtaavoq Ole Kibsgaard nipilersoqatigiinni Shu Bi Dua-kkunni kitaarertuunermi saniatigut Danmarksradiop meeqqanut aallakaatitassiaani Kaj og Andrea-mi saqqumeqataasartoq.

- Eqqumiitsuliortut sisamaalluta kalaallit meerartaannut atuagaaqqiortussanngorpugut, taannalu aqqutigalugu avannaani meeqqat sullinnissaat soqutigilerpara. Taakku ikiorusuppakka taamaattumik aningaasanik katersuiniarlunga aallartippunga ikiuinermi atugassannik. Tamatuma kingorna Red Barnet attavigilerpara taakkulu uanniit aningaasassarsiullaqqinnerupput, Ole Kibsgaard Nuummeeqqammersoq qungujulluni oqarpoq. Tassani nipilersornermik ilinniarfimmi ilinniartitsivoq aammalu kitaarerluni festivalimi Nuummi nipilersoqataalluni.

Isumassarsiaq annertusiartuinnarluni Red Barnetip Upernavimmi meeqqanut ornittagaliaa Qaamaliaq suleqatigalugu suliaq ingerlaqqippoq. Ole Kibsgaard januaarimi Upernavimmiippoq tassalu meeqqat pingaartitatik pillugit taalliornissaannik isumaqatigiissuteqarfigai. Toqqagassarpassuaqarpoq tamatumalu kingorna erinalersornerat Ole Kibsgaardip suliaraa.

- Marsimi Upernaviliaqqippunga immiussisarfik angallattagaq nassarlugu, tassanilu peqataasut suliaat immiuppagut. Assut suliaq soqutiginarpoq. Meeqqat inuusuttuaqqallu tamaviaarlutik sulipput taalliamik erinartaat ilinniarlugit. Tassalu angerlatinnaga tamaasa immiuppagut. Taakku angerlaallugit immiussisarfimmi suliaraakka tassalu cd-nngortillugit. Taanna pingasunngorpat Upernavimmi tusarnaartitsinikkut malunnartitsiniaanermi saqqummissaaq, Ole Kibsgaard nammineq sisamanik meeralik oqarpoq.

Suliaq sivisuumik ingerlareersoq Upernavimmi timersortarfimmi tusarnaartitsinermik nassataqartussanngorpoq innuttaasullu 1.200-ut tassunga qaaqqusaapput. Tassani Ole Kibsgaardip aamma Qaamaliamiittartut meeqqat suliatik siullerpaamik tusartissavaat.

- Neriuppunga suut tamarmik iluatsikkumaartut uatsinnummi misigisaq imaannaanngitsussaavoq. Inussiarnissaarneq ikiuukkumanerlu Upernavimmi siumugarput qujaniarfigalugu tusarnaartitsiniarpugut, neriuppungalu meeqqat torrallaanneq misigisaqarfigilluarumaaraat. Arlallit nunaqarfimmiuupput angajoqqaatik qimallugit atuartut. Taakku ulluinnarni inuunerat imaqarnerutilaarlugu assut nuannerpoq, Ole Kibsgaard oqarpoq, Upernavimmi tusarnaartitsiartuutaa aamma Ilulissani ilinniartitsilaarniartoq.

Kibsgaard Danmarkimut uteruni suliaq tasamani aamma saqqummersinniarpaa suliniut malugineqarniassammat. Maannalu aappaagu Qaanaami assigusumik pisoqarnissaa Red Barnet suleqatigalugu pilersaarusiorneqaleruttorpoq.

- Tamaviaarlungat tv-kkut aallakaatitassiani God Morgen Danmarkimi imaluunnit Aftenshowet-imi peqataaniarsarissaanga taamaasillunga Danmarkimi innuttaasut oqaluttuunniassagakkit tapersersugassaqqissunik Upernavimmi suliniartoqartoq. Uanilu suliniummi ilikkarpara meeqqat alliartornerminni assigiinngitsunik atugaqaraluarlutik assigiittut. Kalaallit Nunaanni Machester United aamma FC Barcelona illersorumaneqartarput aammalu inuusuttuaqqat allatullu ajornartorsiortarlutik, Ole Kibsgaard oqarpoq assut neriuttoq pingasunngorpat Upernavimmi tusarnaariaqarluarumaartoq.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat