Atuakkat ulluanni malunnartitsiniaasoqarpoq

Ullumikkut ulloq nunarsuarmi atuakkat ulloraat, tamannalu malunnartinniarlugu Nunatta Atuagaateqarfiani Nuummiittumi aaqqissuussinerit assigiinngitsut ingerlanneqarput.

Atuagaateqarfimmi meeqqat atuagaannik saqqummersitsisoqarpoq, qitinnermik, pinnguarnermik nipilersornermillu ilaqartumik. Inersimasunit soqutigineqarluartut ilagaat, arnap danskip anersaarsiortartup Marion Dampier-Jeans-ip atuakkiaminik tuniniaallunilu atsiuinera. Marion Dampier-Jeansip atuakkiaminik pisiniartut tamaasa qanoq ateqarnersut apereriarlugit, ilassiulaariarlugilu assaasigut tigusarpai sequnngerlunilu takorluuerpaseriarluni allaffigilaartarlugit.

Marion Dampier-Jeans nunatsinni siornaakkunni tusaamaneqarlualerpoq, Danmarkimi tv-qarfiup TV2-Zulup aallakaatitassiai ”Anersaat Pissaanerat” KNR-TV-kkut aallakaatinneqartarmata.

Atuakkalli ulluat sumut atussavarput ?

Nuummi atugaarniarfiutilik atuakkanillu saqqummersitsisarfiulitik Inger Hauge tamanna pillugu aperaarput, imalu akivoq:

- Isumaqarpunga nunarsuarmioqataanerput taamaalilluta malugisaripput aamma atuakkiortarneq eqqarsaatigalugu. Inger Hauge atugaarniarfimmik saqqummersitsisarfiutigisumik Atuagkat-nik piginnittoq oqarpoq.

Inger Hauge kalaallisut oqalussinnaarpianngikkaluarluni atuakkat ukiumut sapinngisamik aqqaneq-marluk 15-illu akornanni saqqummersittarpai, atuakkallu piumaneqarnerit tassaanerarpai, misigisalikkersaarutit, aammali taalliat soqutigineqarluartarput.

Kalaallisulli atuakkat saqqummersinneqartartut ikippallaarujussuartut, isumaqarpoq, naalakkersuinermillu suliallit sakkortuumik isornartorsiorpai.

- Naalakkersuinermik suliallit tapersersuinerat takujuminaatsippara. Atuakkiorfik saqqummersitsinissamut pisussaaffitualik Namminersornerullutik Oqartussanit namminersortunngorsarneqalerpoq. Namminersortunngorsaasoqareerpat qanoq pisoqassanersoq kialuunnit takorloorsinnaanngilaa. Tamanna assut ernumassutigaara. Inger Hauge naliliivoq.

Inger Hauge aamma oqarpoq, atuakkanik saqqummersitsisarneq pisortanit annerusumik nakkutigineeruppat siunissami atuakkanik atuartartussat tulliuttut annaaneqariaannaasut, atuakkat saqqummertartut ikiliartuinnarnerat pissutaalluni nammineq piumassutsimik atuarnissaq ilikkanngitsoorneqarsinnaammat.

Atuakkat ulluanni atuakkamik rosamillu tunisisarneq spaniami qangali ileqquuvoq, 1995-imilu nunani tamalaani atorneqalerluni.

Isummersuutit



Nutaarsiassaateqarpit?

Nutaarsiassaateqarpit?

1717-imut SMS-erit, UNNIA allariarlugu kingornalu oqaluttuat allallugu.

Immersuivik atorlugu allaffigitigut knr.gl/1717

Emailikkulluunniit 1717@knr.gl

KNR TV: TekstTV-mi paasissutissat

TTV q 110 Ullut tamaasa nutaarsiassat

TTV q 400 Timmisartuutinissat
aallartussat tikitussallu

TTV q 300 Tv-kkut aallakaatitassat
tulleriiarnerat

TTV q 300 radiukkut allakaatitassat
tulleriiarnerat