Atuakkat kalaallisuut tuniniarneqalerput

Kalaallisut atuakkanik 45.000-inik, minnerunngitsumillu atuakkat 800-t sinnillit naqiteqqinneqarsinnaanerinut piginnittuunermik piserusukkaanni, Atuakkiorfiup matunissaanik isumaginnittumut novembarip 27-at nallertinnagu neqerooruteqartariaqarpoq.
Allattoq Elisa Isaksen
novembarip 13-at 2009 09:12

Atuakkanut pineqartunut ilaapput, kalaallit atuakkiaanni nuannarineqarnerpaat suli piumaneqarluartut.

Atuakkiorfik nammineq piumassutsiminik akiligassanik isumannaariniarluni pigisanik aningaasanngortitsiniarluni ukiormanna septembarimi aalajangerpoq. Tamanna Sermitsiami ullumikkut saqqummersumi takoqqusaarutigineqarpoq.

Taamaattorli Atuakkiorfiup atuagaatai qanoq akikinaartigalugit pisiarisinnaanissaat killeqarpoq. Naqiteqqinneqarsinnaanerinut piginnittuuneq, tassunga ilaallutik kalaallit atuakkiaannik pingaarutilinnik naqiterisitseqqissinnaanermut pisinnaatitaaneq, minnerpaamik 100.000 koruuninik akeqarput.

Aamma atuakkat assigiinngitsut 232-t 45.000-iusut toqqortarineqartut, minnerpaamik aamma 100.000 koruunilerlugit tuniniarneqarput. Tamakku tamarmik amerlanerpaamik akiliiumasumut tunineqassapput - matumanili 100.000 koruuninik taakkuluunnit sinnerlugit neqerooruteqartariaqarpoq, piffissaliunneqartorlu ullut 14-it qaangiuppata qaangiutissaaq, tassa novembarip 27-anni.