Nunat Avannarliit Siunnersuisoqatigiiffiat: Atuakkat ajugaassutigineqartut nutserneqassapput
Tamanna Nunat Avannarliit Siunnersuisoqatigiivisa Helsinkimi pingasunngormat ataatsimiinneranni aalajangiunneqarput - siunnersuisoqatigiillu atuakkamut nersornaasiuttagaat ulloq taanna aamma tunniunneqarpoq, Nunat Avannarliit Siunnersuisoqatigiivisa nittartagaanni norden.org-imi tamanna atuarneqarsinnaavoq.
- Atuakkat pineqartut nunani avannarlerni tamani sapinngisamik amerlanerpaanit pissarsiarineqarsinnaanissaat kissaatigaarput, taamaaliornikkut nunani avannarlerni kulturikkut ataatsimoorussaqarnitta pingaarutillip nukittorsarnissaanut ilapittuutaaniassammata, Ilisimasanut Kulturimullu tunngasunut ataatsimiititaliap siulittaasua, Jorodd Asphell, taama oqarpoq.
Siunnersuut ingerlateqqinneqarpoq Nunallu Avannarliit Ministeriisa kulturimut Siunnersuisoqatigiiffianni suliarineqassalluni. Nunallu Avannarliit Ministeriisa Siunnersuisoqatigiiffiata atuakkanik nunanit avannarlerneersunik nutserinermut tapiissutinut missingersuutaat 3,1 millionit koruuniupput. Nunat Avannarliit Siunnersuisoqatigiivini politikerit neriuutigaat aningaasat amerlineqarnerat atuakkiat amerlanerusut nutserneqarnissaannut saqqummersinneqarnissaannullu kajumilersisitsissasoq.
Norgep tv-ata radiuatalu NRK-p 2006-imi ajugaasut pillugit naatsorsuinera naapertorlugu, atuagaq ataasinnguarluunniit norgemiut danskillu oqaasiinut nutserneqarsimanngilaq, pingasut islandimiut oqaasiinut nutserneqarsimanngillat tallimallu finlandimiut savalimmiormiullu oqaasiinut nutserneqarsimanatik. Nunani avannarlerni atuakkianik kalaallit saamillu oqaasiinut aamma maannamut nutserisoqarsimanngilaq.
Atuagaq nunatsinni nuannarineqartoq
Nunat Avannarliit Siunnersuisoqatigiivisa atuakkamut nersornaasiuttagaat Danmarkimeersumut Kirsten Thorupimut ukioq manna tunniunneqarpoq. Taassuma atuakkiaanik kalaallisuungortitsisoqarsimavoq, atuagarli toqqagaassutigisaa "Erindring om kærligheden" tamatumani pineqanngilaq, siusinnerusukkulli atuakkiaa "Lille Jonna" pineqarluni.
Taanna Danmarkimi 1977-imi saqqummersinneqarpoq, Hans Anthon Lyngemillu kalaallisuunngortinneqarluni "Jonnaaraq"-qamik qulequtaqarluni 1988-imi saqqummersinneqarpoq.
Atuakkiortoq Aqqaluk Lynge taama ilisimatitsivoq, atuagassiarlu Kalaaleq sinnerlugu Kirsten Thorupip nersornaaserneqarnera nuannaarutiginerarpaa:
- Qujavugut nunatsinni aamma ilisarisimaneqartoq qallunaaq atuakkiortoq Kirsten Thorup Nunat Avannarliit Atuakkiornermut nersornaasiuttagaanik tunineqarmat. Qallunaat atuakkiortut suli inuusut ikittuinnaat kalaallisuunngortinneqarsimapput tassalu ukioq manna nersornaasigaq (Kirsten Thorup, aaqq.) aamma kalaallisut atuarneqarsinnaavoq, Aqqaluk Lynge taama oqarpoq.
