Atuakkanut tapiiffigitipput
Tassami ilinniagaqartunut tapiissutit pillugit inatsit nutaaq, januaarip aallaqqaataaniit atuutilerpoq, inatsimmilu aalajangersakkanut ilaalluni atuagarsinissamut aamma qimuttuitsunut bussinullu ilaanissamut uppernarsaatit, kalaallinut ilinniartunut tapiissutinut ilaassasut.
Taamaattorli ilinniartut qilanaajaarpallaartariaqanngillat. Tassami Ilinniartitaanermut Naalakkersuisoqarfiup nalunaarut, aaqqissuussinerup nutaap qanoq atuutsinneqarnissaanut tunngasoq suli naammassillugu suliarinngilaa.
Naalakkersuisoqarfimmit Avalak aamma kalaallit illuutaanni ilinniartunut siunnersuisartut, sapaatit akunnerini tulliuttuni ataatsimeeqatigineqassapput, tamatumalu kingorna nalunaarut ilinniartunut aamma ilinniarfinnut tusarniaassutigineqassaaq.
Ilinniartitaanermut naalakkersuisoqarfiup naatsorsuutigaa, atuagarsinissamut tapiissutit semesterip aallartinnerani tunniunneqartassasut aamma bussinut qimuttuitsunullu ilaanissamut tapiissutit qaammatikkaartumik tunniunneqartassasut, tassa ilinniartut nalunaarummi piumasarineqartunik naammassinnissimappata.
Ilinniartuunermi semesterit aallartinnerini, ilinniartut koruuninik tuusintilikkaanik aningaasartuuteqarsinnaasarput. Avalaap nittartagaani taasisitsisoqarmat, ilinniartut 93 procentii sinnillit atuagarsinissamut aamma bussinut qimuttuitsunullu ilaanerminnut taperneqartarnissartik kissaatigaat.