Atuakkanut nersornaasiunneqartartoq nunatsinneersumut tunniunneqanngilaq
Nunat avannaamioqatigiit atuakkiortunut nersornaasiuttagaat nunatsinni atuakkiortumut ukioq manna tunniunneqanngilaq. Atuakkiortup svenskip, 67-inik ukiullip, Göran Sonnevip, taallat “Oceanen”-imik taaguusersimasani nersornaatisissutigai. Nersornaat Københavnimi ukiaru tunniunneqassaaq.
Nersornaaserneqartup politikkikkut inuunermilu pisimasut taalliariinnarnagit, inuit ataasiakkaat imminnut pisuusutut akisussaaffeqartutullu misigisimasarneri taalliarisarmagit, nersornaaserneqartussanik naliliisartunit Göran Sonnevi toqqarneqarsimasoq nalunaarutigineqarpoq.
” Nipaatsumik assigiinngisitaarneq” nunatsinneersumit Julie Edel Hardenbergimit atuakkiarineqartoq, nersornaaserneqartussatut nunatsinniit innersuunneqarpoq.
Danskit atuakkianik isornartorsiuisartut arlallit atuakkamik tassannga innersuussineq isornartoqartippaat. Berlingske Tidendemi atuakkanik innersuussisartoq ullumi saqqummersumi allappoq, atuagaq innersuunneqarsimassanngikkaluartoq, atuakkiaanani assilisanilli imaqarnera peqqutigalugu.
