Atuakkanik atuarnikkut saammaateqatigiittoqassasoq ministerip kissaatigaa
Ilumoortussaq pillugu Saammaateqatigiinnissamullu Isumalioqatigiissitami suliat siorna naammassineqarmatali saammaateqatigiinnissamut suliniutit arlaliusimapput.
Naggueqatigiit inuit, indianerit métisillu amerlasuut isumaat naapertorlugit nunap inuviisa kulturii inooriaasaallu assigiinngitsuusut paasinerisigut saammaateqatigiittoqarsinnaavoq. Tamannalu alloriarneq siullertut taakkartoraat, ministeri oqarpoq.
Nunap inuviisa taalliai, atuakkiai oqaluttuatoqaalu atuarnerisigut naggueqatigiit pitsaanerpaamik paasineqarsinnaasut Canadap nunap inoqqaavinut tunngasunut ministeriata Carolyn Bennettip oqalugiarnermini ilaatigut oqaatigaa.
Aamma atuaruk Canadami nunat inoqqaavisa oqaasiinik ilinniartitsinialersut
Canada tamakkerlugu nunap inuviisa atuakkiai junip qaammataani ulloritinneqartalissasut ministerip siunnersuutigaa. Inuit, indianerit métisillu atuakkiai, oqaluttualiai taalliaaluunniit Canadarmiunit atuarneqartalissasut tassani siunertaavoq.
Canadamilu meeqqat atuarfiini atuartut universitetinilu ilinniartut nunap inuviisa atuakkiaannik ulluni makkunani ilinniartinneqaleruttorput.
Carolyn Bennettsillu saammaateqatigiinnissamut isumassarsiaa eqquuteratarsinnaasoq, ilanngutassiortutta Marianne Stenbækip oqaatigaa.
