Atuagaq pinerluttulersaarut nunatsinneersoq nersornaaserniaraat
Atuakkap qulequtaraa 'Frosne Beviser' (Uppernarsaatissat qerrussimasut, aaqq.), Nina von Staffeldtimit atuakkiaalluni naqiterisitsisarfimmiillu Milik Publishingimit saqqummersinneqarluni.
Atuakkiortullu Siullermeertumik atuakkiortumut 2016-imi nersornaammik tunineqarnissani nuannaarutigisupilussuuaa.
- Naak ullualuit matuma siorna paasereeraluarlugu suli upperiuminaatsippara. Nuannaaqaanga, atuakkiortoq oqarpoq.
Attaveqaqatigiinnermik siunnersorti Sika Haslund Nuummut utertoq atuakkami sammineqarpoq. Taanna Sisimiuni nappaalasoqarneranut eqqumiitsumut qanga pisimasunut attuumassuteqartumut akuliutsinneqarpoq.
Amerlaqisullu oqaluttualiani nuannarigaat, Nina Von Staffeldtip oqaatigaa.
- Arlallit allaffigaannga "Quppernermi tassani ima allannerit paasisinnaalluarpara" aamma "Taamatut allaaserisaqarnerit pingaartuusoraara." Aamma Danmarkimi inuit ima oqartut tusartarpakka "Sunaaffa taamaattoqarpoq", atuakkiortoq taama oqarpoq.
Nunatsinni pissutsit pillugit allaaserisami Nunatsinni ilisarineqarsinnaanerat Danmarkimilu tupaallaatigineqarnerat atuakkiortup nuannaarutigaa.
- Inuit uppernarsisaqarnerat imaluunniit ilisarisaqarsinnaanerat imaluunniit nuannaajallaatigisaminnik tupaallaatigisaqarnerat nuannersupilussuuvoq, atuakkiortoq oqarpoq.
Nina von Staffeldt Nunatsinni 1997-imiilli najugaqarpoq, sulilluni angalasarlunilu, maannali Danmarkimi najugaqarpoq. Nersornaatisinini Nunatsinni atuakkiortarnermut sunniuteqassanersoq oqaatigisinnaannginnerarpaa, nunattali avataani atuartartut tv-kkut aallakaatitassiatigut danskillu aviisiisigut takusartakkaminnit allaanerusumik isiginnilersinnaanissaat neriuutiginerarpaa.
- Ulluinnarni misigisartakkakka (Kalaallit Nunaanni, aaqq.) oqaluttuarerusuppakka, tamatumalu soqutigineqarnera nuanneqaaq, atuakkiortoq oqarpoq.
Nina von Staffeldtip atuakkiami 'Frosne Beviser'-ip nanginnera maanna suliarileruttorpaa. Taanna qulequtaqassaaq 'Den Sorte Engel' 2017-illu qiteqqunnerani saqqummersinneqassalluni.
Siullermeertumik atuakkiortumut 2016-imi nersornaat Nina von Staffeldtimut Pinerluttulersaarutinik atuakkiat pillugit Herningimi nittarsaassinermi apriilip aallaqqaataani pisortatigoortumik tunniunneqassaaq.
