Atuagaq MIPI-p saqqummersitaa iluarineqarpoq

Erik Lund oqarpoq atuakkap innersuussutai malinneqartuuppata Kalaallit Nunaanni ajornartorsiutit ilorraap tungaanut aallarsinnaagaluartut.

Kalaallit Nunaanni meeqqat inuusuttullu atugaat pillugit atuakkiaq qulequtaqartoq”Meeqqat inuusuttullu Kalaallit Nunaanni” Danmarks radiop P1-mi aallakaatittagaani, Orienteringimi, atuakkanik naliliisartumit Erik Lundimit angisuumik nersualaarneqarpoq. Atuakkiami ilaatigut qaqilerneqarpoq inuusuttut amerlasuut ilinniarnerminnik sooq unitsitsiinnartarnersut. –Atuakkiami saqqummersinneqarput inuit assigiinngitsut 25-t allaaserisimasaat 23-t. Allaaserisani tikkuussissutigineqarpoq, suut sakkut atoraanni, qanorlu suliniuteqaraanni kalaallit Nunaanni sumiginnaanerujussuaq aningoriartorneqarsinnaanersoq.

- Aallaaserisani sammineqarput ilisimatusarnerni paasineqartartut kiisalu aamma misilittagaalersut, oqarpoq Erik Lund nangipporlu: atuagarlu imartooq 384-nik qupperneqartoq oqinnerusuusilerpoq kajungernarsillunilu, saqqummersitsivik torrallaalluni Ummannami børnehjemmimeersunik assinik kusanarluinartunik assitalersuisimammat. Erik Lund aamma oqarpoq assit uummannami børnehjemmimeersuunerat nalaatsornerinnaanngitsoq tassanimi meeqqat najugaqartut sumiginnakkat, kulturi isumassuilluarnerlu ataqatigiisillugit pitsaasumik ikiorserneqarnikuupput siunissaat qamanerusunngortillugu.

Siku ingerlavik qajannartoq qimallugu qajannaattoq aqqutigineqalersinnaavoq perorsaariaaseq ilinniartitaanerlu kulturimik isumassuilluarnermillu tunngaveqarpata. – Aammali atuakkami mianersoqqussutigineqarpoq kalaaliussutsip kalaallisullu inoriaatsip kisimik toqqammaviginaveersaartariaqarneri, Erik Lund oqarpoq.