Atuagaq `Grønland - Mægtig og Afmægtig saqqummilerpoq

Namminersorneq pillugu Isumalioqatigiissitaq ullumi naggataaq ataatsimiippoq, aammattaaq Kalaallit Nunaat pillugu atuakkamik saqqummiisoqarpoq.
apriilip 16-at 2008 17:00

Atuagaq tusagassiortumit ulluinnarnilu weekendavisenimi sulisuusumit Marianne Krogh Andersenimit atuakkiarineqarpoq.

Atuagaq qulequtaqarpoq: `Grønland – Mægtig og Afmægtig. Kalaallit Nunaat – sunniutilik sanngiitsorli, taama kalaallisuunngortinneqarsinnaagunartoq.

Marianne Krogh Andersen-ip weekendaviisimi aviisiliortup nunatsinniittarsimaqisup, kitaani tunumilu innuttaasut tamaneersut siunissaq pillugu oqaloqatigereerlugit atuakkiani aqagu saqqummersissavaa. Taamaammat aperaarput aqagu ulloq Namminersulivinnissamut ataatsimiititaliarsuup sullivissaa ulloq kingulleq qanoq nunatta oqaluttuarisaaneranut sunniuteqassangatinneraa:

- Isumaqarpunga aprilip 17-iat ingerlaarfissamut annertoorujussuarmut, tassalu namminiilivinnissamut qattuniinnannguatut ittuussasoq, kiisalu ikaarsaariarfiussaaq pingaarutilik kalaallimmi nunaminnut pisuussutaanullu piginnittussaalernissaanut alloriarneruvoq, soorlumi eqqartuussiveqarneq politiinillu akissaaffeqalernissaq pisussaasoq, tamakkumi nunat allat aamma akisussaaffigereerpaat, Marianne Krogh Andersen oqarpoq.

Kiisalu isumaqarpoq kalaallit amerlanersaat namminiilivinissamik kissaateqartut tamannami ukiuni 150-ini oqallisaareermat tassalu kiisami pisoqalerluni.

- Taamaattorli isumaqarpunga inuiaqatigiinni aningaasarsiornerup assigiinnginnerujussua inuuniarnikkullu atugassarititaasut imminnut attumassuteqannginnerujussuat pissutigalugu inuiaqatigiinni pissakinnerpaartaasut ernummatigissagaat atukkamik ajornerulernissaat, taamaassappammi pilliut annertussaqimmat.

Marianne Krogh Andersenip atuakkiaa inuttaata nunatsinnik nuannarinninnerujussuanik imaqarpoq.

- Aappaatigut Kalaallit Nunaat tupinnartorsuuvoq - silarsuarmi kusanarnerpaasoq, nuannersunik innuttaqartoq, tamanna atuakkianni tunngavigaara. Illuatungaatigullu naassaanngitsumik annertooq inuuniarnikkut annertuunik ajornartorsiuteqarfiusoq, aaqqinniagassanillu imaannaanngitsunik nammakkiisoq, taamaattorli isumaqarpunga isumalluarnartoqaqisoq, pisuussutimmi annertoqaat innuttaasunut ikittunnguanut tuttussat, Marianne Krogh Andersen oqarpoq. Aperaarpullu siunissami Nunatta aqutsisussai nunanit allaneersunit inangerneqalersinnaaneri ersissutigineqarsinnaanersoq taamaalissappallu sakkussaminnik pitsaasunik peqassangatinnerai?

- Malinnaaffigissallugu assorsuaq soqutiginarpoq, Marianne Krogh Andersen naggasivoq.

Namminersulernissamut ataatsimiititaliarsuaq maajip naajartulernerani suliaminik tunniussisussaavoq.