Atuagaq "Arnatsialaat" ullumi saqqummissaaq

Arnat kalaallit arfineq marluk atuakkami nutaami ”Arnatsialannik” atserneqarsimasumi inuunerminnik oqaluttuarinipput, atuagarlu ullumikkut pisiarineqarsinnaalerpoq.

Atuagaq pilersinneqarpoq aviisiliortup Pia Christensen-ip aammalu assiliisartup Ulrik Bang-ip suleqatigiinnerisigut.

Arnat arfineq marluk oqaluttuarnerisa saniatigut, atuagaq arnarpassuit assiinik taakkualu avatangiisaannik imaqarpoq.

- Atuakkap ersersippaa, Kalaallit Nunaanni nukittuunik arnarpassuaqartoq, pilluartunik, nukittullutik sunniuteqaqataasunik aningaasat partiipolitikkilu eqqarsaatiginngikkaluarlugit. Pitsaasunik inuuneqarnermikkut, akulerusimallutik ilaatigullu anguniagaqartunik. Tuniussimassuseq ilaatigut ataqqinassusermik ataqqineqarnermillu pissarsiaqaataasinnaasartoq naapittagaralugu, naqiterivik Milik ”Arnatsialaat” pillugit nalunaarummini ilaatigut taama allappoq.

”Arnatsialaat” Katuami ualeru saqqummersinneqassaaq assilissanillu saqqummersitsisoqassalluni.

Atuagaq kalaallisut qallunaatullu saqqummerpoq.