Atuagagdliutit Sermitsiarlu kattutissapput

Kalaallit Nunaanni aviisit marluk nuna tamakkerlugu saqqummersartut inuussutissarsiornikkut aningaasaateqarfittut AG-tut Sermitsiatullu 2010-mi januaarip aallaqqaataaniit kattutissapput. Kattunnerup kinguneranik Atuagagdliutit sapaatip akunneranut ataasiarlutik saqqummertalissapput.
novembarip 13-at 2009 09:28

Aviisit taakku marluk takoqqusaarutitigut isertitaat, piffissami kingullermi ikiliartorsimanerat, aviisit aningaasaqarnikkut ajornartorsiulernerannik kinguneqarpoq. Taassuma saniatigut aviisinik nassiussinermi tapiissutip peerneqarnissaa aviisit aningaasaqarnerannut ajoqusiisoq, aviisit tusagassiorfinnut nalunaarumminni oqaatigaat.

- Qanittukkut aviisit taakku marluk naleqqussaapput, taamaakkaluartorli siunissaq suli nalorninarpoq.Taamaattumik aviisit siulersuisui marluk aalajangersimapput aviisit taakku marluk kattunniarlugit, Atuagagdliutit Sermitsiarlu tusagassiuutinut nalunaarummini taamatut allapput.

- Nunatsinni tusagaassiorfinnik arlaannulluunnit pittortorsimanngitsunik peqarnissaa qulakkeerniarlugu taama aalajangerpugut. Aviisit marluk ilisimaneqarluartut sapinngisamik piujuarnissaat taamaalilluta anguniarparput, Sermitsisap siulersuisuini siulittaasoq, Jette Larsen, oqarpoq.

Aviisit ataannarnissaasa qulakkeernissaat, suliffiit amerlanerpaat qulakkeernissaat minnerunngitsumillu tusagassiuutit kiffaanngitssuseqarnerisa qulakkeernissaat, kattunnermut tunngavilersuutigineqarput.

Kisianni sulisunik ikilisaasariasaqarnissaq Jette Larsenip isertorsinnaanngilaa.

- Qaammatini kingullerni aningaasartuutilkillisaanitsinni pingasunik sorarsitsisasariaqarsimavugut, aammalu kattunnnitsinnut atatillugu soraarsitseqqittariaqassaalluta, Jette Larsen oqarpoq. Qasserpiaalli soraarsinneqassanersut oqaatigisinnaanngilaa.

Atuagagdliutit sapaatip akunneranut ataasiarlutik saqqummertalissapput marloriartarunnaarlutik. Sermitsiaq pisarnermisut sapaatip akunneranut ataasiarluni saqqummertassaaq.

Aviisit marluk ukiortaamiit ataatsimik nittartagaqalissapput. Aviisini marlunni aviisilioriaaseq attanneqassaaq, tamannalu ersarissumik aaqqissuisoqarnikkut qulakkeerneqarluni.

Aaqqissuisoqarfiit februaarip aallaqqaataaniit Sermitsiap illuutaaniilissapput.

Inuussutissarsiornikkut aningaasaateqarfik AG/ Sermitsiaq aqqissuisuunermit Poul Krarupimit aqunneqassaaq, Inga Dora G. Markussenilu akisussaalluni aaqqissuisuunerussalluni.

Siunissami ingerlatsinissaq aaqqissuussaanerlu qanoq issanersoq aaqqissuisuunerit marluk eqqartuleruttorpaat.

Aviisini kattuttussani danskit aviisiini marlunni, atortoqarnikkut kattussimasuni, Jyllands-Postenimi Politikkenimilu siulersuisut siulittaasuat, Jørgen Ejbøl siulersuisuni siulittaasunngussaaq. Ole Dorph, Kent Kleinschmidt, Svend Erik Danielsen, Peter Frederik Rosing kiisalu Atuagagdliutit siulersyuisuini maannamut siulittasoq, Ole Kielmann, siulersuisuni aamma ilaasortaassapput.