Atuagagdliutit saqqaani assimut kukkusumut AG isumaqatigiissuteqarpoq
Atuagalliutinit tallimanngormat nalunaarutigineqarpoq, aviisip Ivinnguaq Brandt isumaqatigiissuteqarfigisimagaa.
Aviisimi normu 22-mi Ivinnguaq Brandip assingi allaaserisamut inuttaanut tunngassuteqanngivissumut atorneqarnerat, isumaqatigiissuteqartoqarneranut pissutaavoq.
Suliaq illuatungeriinnit naammassisutut isigineqartoq, Atuagalliutit akisussaallutik aaqqissuisuat Christian Schultz-Lorentzen aamma Ivinnguaq Brandt ataatsimut taama nalunaaruteqarput.
Nunatsinni tusagassiorfiit tusagassiuinermi ileqqussanut eqqummaarinneroqqullugit, Tusagassiuinermik suliaqartut Peqatigiiffianni siulittaasup Mariia Simonsenip Nunatsinni tusagassiorfiit taamani kajumissaarpai.
Arnammi toqutsisut pineqartut marluusut aappaat toqutsinermi nalaani taamaallaat 17-inik ukioqarmat, tusagassiorfiit mianersornerusariaqartut, Mariia Simonsen taamani nassuiaavoq.
Tamannali kajumissaarineq Atuagalliutit soqutigigunanngilaat. Tassami Nuummi blok 17-imi toqutsinermut atatillugu, aviisimi kingullermi saqqummersumi pasineqartut ilaat 17-inik ukiulik atianik taallugu ilannguppaa. Tamannalu pivoq eqqartuussinermi suli pineqaatissiisoqanngitsoq.
