Attuumassuteqanngitsut misissuiffigineqarnissaa kalaallit Nunaanniit aalajangiusimaneqarpoq
Naalakkersuisut siulittaasuata, Kuupik Kleistip, aviisimut Politikenimut tamanna ullumi erseqqissaatigaa. Danmarkimi naalakkersuisut qaammatip uuma naalernerani ataatsimeeqatigilerunigit isummaminnik allanngortitsinissaat piumasariniarpaa.
Kuupik Kleist pisumut aatsaat akuliuppoq. Inatsisartut Nunanut allanut-naalagaaffiullu isumannaatsuunissaanut ataatsimiititaliap isumaqatigiittut misissuisoqarnissaanik piumasaqaat ippassaq akuersissutigereeraallu nalunaarutaa tutsiuppoq. Kuupik Kleistip pisumut maannamut qanoq iliuuseqarsimanera paaserusullugu isumasioqatigiinnissamut ataatsimiititaliamit aamma aggersarneqarpoq.
CIA-lli timmisartuussisarneragaanerata misissuivigineqarnissaa piumasariuarniarlugu Kuupik Kleist tassa maanna nalunaarpoq.
Folketingimi apersuinissamut ullumi piffissaliussami pisumut apeqqut Enhedslistenimit nunanut allanut tunngassuteqartunut ministerimut, Villy Søvndalimut, qaqinneqarpoq. Sumulluunniilli attuumassuteqanngitsumik misissuineqarnissaanut partiini allamik sooq isummersimanersoq Villy Søvndalip akissuteqarfiginngilaa.
- Misissueqqinnissamut apeqqut akissutissaqartinneqarnersoq naluara, Villy Søvndal oqaannarpoq. Frank Aaen, Enhedslistenimeersoq, Villy Søvndalip taama naatsigisumik oqaaseqarnera pillugu mianersoqqusivoq naalakkersuisuusimasut, sumilluunniit misissuerusussimanngisaannartut, ileqqutoqaat, naalakkersuisut nutaat ingerlateqqiinnarniarunaraat.