Attumi solar uulia minnerpaamik 350 liiteri kuuttoq

Attumi Pilersuisup tankeqarfiani solar uuliamik annertuumik ataasinngornermi kuuttoqarpoq. Maannali kuuttoq unitsinneqarsimasoq, ulorianartorsiortitsinngitsorlu, Attumi qatserisartut aqutsisuat ilisimatitsivoq.
Solar uuliap kuuffigisimasaa, tipaarsarniarlugu qatserisartut skummimik kuutsitsiffigaat. Assi © : Assi: Privat:Thomas Alaufesen
Solar uuliakoornera kuunnermini imaanut annguppoq uloriananngitsorli, Kommune Qeqertalimmi upalungaarsimasut nalilerpaat. Assi © : Assi: Privat:Thomas Alaufesen
Solar uulia 350 liiterip missaanniittoq Attumi qatserisartut piiarpaat, nappartat marluk ulikkaarlugit. Assi © : Assi: Privat:Thomas Alaufesen
Allattoq Marie Kûitse Kristensen, Ivik Kristiansen
aggustip 06-at 2020 06:50

Attumi inuusuttut marluk sissami unnukkut arfineq pingasut missaani aneertillutik eqqumiigisaminnik naamasaqalerput.

- Imaq pissusissamisuunngitsoq takuleratsigu, tippassimallunilu. Tipippallaaqimmat qummut tankeqarfik alakkarteratsigu kuussuaartoq takulerparput .

Uuliakoornermik takunneqqaartoq, Arne Abrahamsen taama oqaluttuarpoq.

Takunnissimasut qatserisartunut saaffiginnipput, qatserisartullu Pilersuisumut saaffiginnimmata maqisoq unitsinneqarpoq.

Assi © : Thomas Alaufesen

Attumi qatserisartut aqutsisuat, Thomas Alaufessenip oqarnera naapertorlugu tankeqarfik cementimik ungalusimavoq. Cementili qulloorsimammat uulia qulloorneratigut kuulersimavoq.

- 200 liiteri sinneqassaaq. Taava milluaatit aamma qanoq imaqartigisarsimappat milluartaat litererpaalunnguusimassaaq.

Thomas Alaufessen taama oqarpoq, nangillunilu:

- Kisianni ataatungaa issuugami solarimik immaqa aamma milluaasimassammat qanoq annertutigisoq kuussimanersoq eqqoriaruminaappoq.

Tankeqarfiup iluani silaannaajaaviup ruujoriata ussiillisimaneranik maqisoorneq aallaaveqartoq, Pilersuisumi Polaroilip ingerlatsinermut pisortaa, Gerth Jack Storer KNR-imut mailikkut paasissutissiivoq.

- Tankeqarfimmi gasoliemik kuuttoornermut atatillugu suliassaq qatserisartunit ingerlaannaq suliarineqalerpoq, gasolie 350 liiteri missaaniittoq, tassalu nappartat marluk katersorlugit.

- Tankeqarfiup iluani ruujori silaannaajaavik (Luftudskiller / returrør) ussiippoq. Ussiitsoq aaqqinneqareerpoq unitsinneqareerpoq, aaqqiiniarluta suliniuteqarpugut, Gerth Jack Storer allappoq.

Maqisoorneq ulorianartorsiortitsinngilaq

Qatserisartut aqutsisuata oqarnera naapertorlugu solar uuliap kuunnera Attumi innuttaasuni ulorianartorsiortitsinngilaq.

- Tassa tamanna salitarput imaaratsigu, piareeriaratsigu skummimik qallerparput, tassami aamma tipiliornera millisarniarlugu.

Tankeqarfiup eqqani saliineq naammassisutut nalilerneqarpoq, qatserisartullu ittuata uuliakoorneq ernumananngitsutut nalilerpaa.

- Tassa skummimik qalleratsigu kinaaruusaassooq (koorusaassaaq) immamut ilimanarpoq. Taava aalanngornissaa ilimanarpoq taanna kuuttoq.

Aamma atuaruk

Politiit ullormut nalunaarusiaat: Tillinniartoqarlunilu tillinniariaraluartoqarpoq