Kalaallit Nunaani agguaqatigiisillugu inuk ataaseq sapaatit akunneranut imminut toquttarpoq, tamannalu Paarisap akiorniarlugu oqarasuaammik saaffiginniffissamik unnugu ammaassaaq.
Saaffiginnittarfik ”Attavik” 146-mik normuqartoq pingasunngornikkut arfininngornikkullu ammasassaaq arfineq marluniit qulit tungaanut saaffigineqarsinnaassalluni.
Saaffiginnittarfik ”Attavik” nunatsinni pisariaqartinneqartoq Paarisami ataqatigiissaarisoq Maren L.Heilmann oqarpoq.
-Tassa imminut toquttarneq annertuumik ajornartorsiutaammat, immikkut suliniummik 2004-mi politikkikkut suliaqartut aaliangiipput aallartittoqassasoq, Maren L. Heilmann Paarisami ataqatigiissaarisoq oqarpoq.
Kikkut imminnut toquttarnersut toqqaannartumik misissuisoqarsimanngimmat oqaatigineqarsinnaanngilaq.
- Kisianni misilittakkagut naapittagut angalasarnitsinni, inuit arlaatigut artorsaatillit, ajornartorsiutillit taakkuukkajunnerusarput illoqarfinni nunaqarfinnilu tusartakkagut imminnut toqussimasut, Maren L. Heilmann oqarpoq.
Inuk imminut toqukkaangami suna imaluunniit suut ajornartorsiutigisarneraa akissutissaqarneq ajorpoq.
-Attavimmut saaffiginnittoq ikiorneqartartussaavoq, siunnersuinikkut oqaloqatigiinnikkut. Saaffiginnittup sapinngisamik oqaluttuariniartassavaa nammineq inissisimaffini, ajornartorsiutimi suunera oqariartuutigalugu, tassanilu siunnersuineq aallaaviusussaassooq, aqqutissiussiinerlu, Maren L. Heilmann, Paarisami ataqatigiissaarisoq oqarpoq
Inuit imminut toqukkusuttut oqaluutiinnarlugit unitsinneqarsinnaanersut ilisimaneqanngilaq.
-Sapinngisamik inuk aaliangersimappat imaluunniit kissaateqarpat Attavimmi ikiorserneqartussaavoq, imminut toqunnissamut aqqut taanna aqqutissaannginnerarlugu, ilaqutaasullu qimangaasimasut aamma tapersersorneqarnissaat aamma siunertaavoq, Maren L. Heilmann Paarisami ataqatigiissaarisoq oqarpoq.
Attavik 146-mik normulik akeqanngitsumik kinaassutsimillu isertuussilluni saaffigineqarsinnaasoq Paarisamit erseqqissaatigineqarpoq.