Attaviginiartarsimagaluarpaat kinguneqanngitsumik
Danmarkimi muamaamik upperinnittut sinniisaasa aviisimi Jyllands-Postenimi muamaamik titartakkat saqqummiunneqarnerisa kinguninnguali danskit kultureqarnermut ministeriat Brian Mikkelsen allakkatigut attaviginiartarsimagaluarpaat, kinguneqanngitsumilli.
Angiluttoramik Danmarkimi muamaakkormiut isumaqatitik nunani allaniittut ikiortiseralugit iliuusissaminnik ujarlilersimapput.
Danmarkimi muamaamik upperinnittut sinniisaasa danskit kultureqarnermut ministeriannut allagaat akineqanngisaannartut Brian Mikkelsenip oqaaseqarfigerusunngilai.
Allakkat apuussimannginneri politikkimut samminani allakkanilli immikkoortiterinermi kukkunerunerarpaa.
Allakkat oktobarip arfernani naqissuserneqarsimasut kultureqarnermut ministereqarfiup allaffippasuisa ilaanni uninngatiinnarneqarsimapput. Kinguneri ullumi ilisimavavut.
-Allatut sapileratta nunani allani aallartitat uppeqatigut isumasiorpavut, - neqeroorfigineqarpugut Cairomi upperisarsioqatigiit siuttuinik politikerinillu nuimasunik oqaloqateqarsinnaanitsinnik; Danmarkimi muamaamik upperinnittut sinniisaasa oqaaseqartartua Ahmed Akari nassuiaavoq. Pisorli Brian Mikkelsenip oqaaseqarfigerusunngilaa.
Ministereqarfiullu pisortaata Karoline Kjeldsenip pisoq ajuusaarutigaa, kukkunerunerarlugulu.
Allakkani oktobarip arfernanik ullulikkani titartakkat pillugit Danmarkimi muamaamik upperisallit, kultureqarnermut ministeri Brian Mikkelsen, sakkortuuliortoqartinnagu qanoq iliuuseqartoqarsinnaaneranik oqaloqatigerusussimagaluarpaat.
Sulialli taamaattut statsministereqarfiup isumagisassarigai, kultureqarnermut allaffimmi pisortaq Karoline Kjeldsen erseqqissaavoq.
