Attaveqarnermut naalakkersuisoq nipangersaasimasutut pasineqarpoq

Kisianni Jens B. Frederiksen-ip paasissutissanik kaltersiniarnermut killilersuinerangaanini ilumuunnginnerarpaa.

- Naliginnaasuuvoq, naalakkersuisoqarfitta ataaniittut, soorlu Nukissiorfiit susassaqarfiillu allat, pillugit saaffiginnissutissat naalakkersuisoqarfimmut toqqaannartumik saaffiginnissutigineqartarnerat. Aamma naalakkersuisoqarfinnut allanut taamaappoq, Jens B. Frederiksen oqarpoq

Taanna aperigatsinni, assersuutigalugu atuartut Nukissiorfinnut tunngasunik paasiniaaniarunik, taava Naalakkersuisumut saaffiginneqqaassanersut, taamaannginnerarpaa.

- Atuartut, tusagassiortut allallu Namminersorlutik oqartussanut paasisassarsiorusuttut tikilluaqquisaapput, Jens B Frederiksen oqarpoq.

- Uani allaassussaa tassaavoq, Inatsisartuni oqaluuserisassaq pilugu paasiniaasoqarmat. Taava soorunami pingaarpoq, Naalakkersuisut Inatsisartunut ilaasortat tamarmiusut assigiimmik paasitinneqartarnissaat, Jens B. Frederiksen nangippoq.

Nukissiorfiit ittuanik nipagersaasimasutut Siumumit pasillerneqarnini taassuma oqaaseqarfigiumanngilaa.

Kisianni Aleqa Hammondip naalakkersuisunut ilaasortap anasuiaatai naammaginngilai.

- Partiitut allatuulli pisinnaatitaaffeqarpugut, Naalakkersuisumut apereqqaarata pingaartumik inuiaqatigiit suliffeqarfiutaannut paasisassarsiorsinnaalluta.

Inuiaqatigiit kikkut tamat oqartussaaqataaffiattut aaqqissuussaavugut. Kina oqarami, kikkulluunniit Namminersorlutik Oqartussat suliffeqarfiutaanukarniarunik Naalakkersuisunut apereqqaassasut? Inuiaqatigiit demokratiskiusut taama suleriaaseqartoqarneq ajorput, Aleqa Hammond oqarpoq.

Aleqa Hammondip suliaq Inatsissartuni ingerlateqqinniarpaa, siullermilli naalakkersuisunut apeqquteqaqqaassaaq.