Attaveqarfimmik pilersitsilerput

Attaveqarfimmik nutaamik, suliffeqarfinnit atorneqarsinnaasumik, Kalaallit Nunaanni aallartitsisoqalerpoq.

Kalaallit Nunaanni suliffeqarfiit soqutiginnittut aviisip Børsenip inuussutissarsiornermut immikkoortortaata, Børsen executive club-ip, attaveqarfiginiarpai.

Attaveqarfimmik taamaattumik pilersitsinissamut isumassarsisuuvoq kalaallit arnat volleyball-ertartut nuna tamakkerlugu sungiusaasuat, Jens Graabæk. Taassuma Børsen ukiarmi attaveqarfigisimavaa Kalaallit Nunaannilu suliffeqarfiit arlallit aamma attaveqarfigalugit.

Kalaallit Nunaanni attaveqarfiup qanoq ingerlanneqarsinnaanera oqallisigisineqartarsimavoq.

- Attaveqarfik Kalaallit Nunaat tamakkerlugu atorneqarsinnaasuussaaq, Tele Greenland aqqutigalugu Sisimiuni, Ilulissani, Qaqortumi Maniitsumilu attaveqaatinik upernaaru ikkussissaagut, Jens Graabæk oqarpoq.

Børsenip aaqqissuisuunera, Leif Beck Fallesen, aallartisaaniarnermut atatillugu nunatta Kujataanukarlunilu Nuummukassaaq, tamanna sapaatip akunnerata uuma ingerlanerani pissalluni.

- Attaveqarfimmik taamaattumik pilersitsinikkut kalaallit inuussutissarsiornermik suliallit maluginiarneqarnerulersinnaassasut neriuutigaara, tamatumalu Danmarkimi tusagassiorfinnut allanut aamma anngunnissaa neriuutigilluinnarlugu, Jens Graabæk oqarpoq.