Attaveqaatit Nuummiit kujammut ajorsipput
Sinerissami silarlunnerujussua assigiinngitsutigut sunniuteqarpoq. Perserluni anorlernerujussua pissutaalluni maannakkut Nuup Qeqertarsuatsiaallu akornanni radiokkut attaveqaatit atorsinnaajunnaaqqapput, aallakaatitsinermilu maligaasanik tigooraat NAPO silarlummit eqqorneqarsimalluni.
Telefonikkut attaveqaatit maanna satellitimut attavilerneqarsimalerput, avannaani kujataanilu attaveqartoqarsinnaalluni.
Qeqertarsuatsiaaniilli kujammut Kalaallit Nunaata Radioa TV-alu tusaaneqarsinnaananilu isiginnaarneqarsinnaanngilaq.
Nuummiit kujataanut mobiltelefonit Internettilu atorsinnaajunnaaqqapput.
TELE Greenlandip iluarsaassinissaq siunertaralugu Air Greenlandip timmisartui attaveqarfigisimagaluarpai, silalli ajorpallaarnera pissutigalugu Air Greenlandi timmerusussimanngilaq.
TELE-mi atortutigut pisortaq Ole Vognseni nalunaarpoq aqagu sila ajunngippat, ullaakkut nalunaaqutaq tallimat qaangerlugit tanneq marlunut iluarsaassiartortoqassasoq, oqaatigisinnaannginnerarpaalu ajornartorsiut qanoq annertutiginersoq.
Ullaa´tungaa Nuummi kallerup innerata qamittoornera pissutaalluni Upernavimmi, Qaanaami, Illoqqortoormiuni Tasiilamilu Radio, TV, Internetti mobiltelefonillu attaveqarsinnaajunnaarput. Illoqarfinni taaneqartuni attaveqaatit ualeq manna iluarsineqarsimasut TELE-Greenlandimit nalunaarutigineqarpoq.
