Attaveqaatit eqqarsaatigalugit namminersortoqalersinnaanngikkallarpoq
Internetikkut attaveqaateqarneq akikinnerusoq Inu IT A/S-ip pilersaarutigisaa atuutilersinnaanngitsoq, Ineqarnermut attaveqarnermullu pisortaqarfimmi souschef-i Kasper Juhl-Nielsen oqarpoq.
- Tele-p avammut ammanerusinnaaneranut atatillugu inatsit ullumikkut atuuttoq killiliivoq. Taamaammat inatsisartut naalakkersuisulluunniit allannguinissamik aalajangiinngippata allannguisoqarsinnaanngilaq, Ineqarnermut attaveqarnermullu pisortaqarfimmi souschef-i Kasper Juhl-Nielsen oqarpoq nangillunilu:
- Tele pillugu inatsisartuni eqqartuinissaq upernaaru inatsisartut ataatsimiinnissaanut kinguarteqqittariaqarsimavarput. Aamma Ineqarnermut Attaveqarnermullu nutaamik naalakkersuisoqalissagaluarutta suliassaasunut isertinniaqqaatariaqarparput, Kasper Juhl-Nielsen oqarpoq.
Inu IT A/S-mi suliassanik ataqatigiissaarisartoq Hanne Nielsen oqarpoq internetikkut attaveqaatinik akikinnerusunik pilersitsiniarneq nuummiinnaagallartoq ingerlanneqarniartoq, kingusinnerusukkulli illoqarfik Qaqortoq immaqalu aamma Maniitsoq ilanngunneqarsinnaasoq oqaatigaa. Uggornartuunerarpaali inatsisartuni Tele-p samminneqarnissaata kinguartinneqartuarnera.
- uggornartorujussuuvoq, neriuppugullu erniinnakanneq suliaq una ingerlanneqalissasoq, taamaammat tapersersoqqulluta, Naalakkersuisunut aallagaqarluta saaffiginnissimavugut Hanne Nielsen Inu: IT A/S-mi suliassanik ataqatigiissaarisartoq oqarpoq.
Ineqarnermut attaveqarnermullu pisortaqarfimmi souschef-i Kasper Juhl-Nielsen oqarpoq Kalaallit Nunaanni innuttaasut ikeqimmata, attaveqaateqarneq eqqarsaatigalugu namminersortumik ingerlatsisoqarsinnaanera killeqartoq.
- Assersuutigissagaanni Danmakimi attaveqarnermut aningaasanik isaatitsiviusinnaapput innuttaasut 90 procentii, sinnerilu 10 procentit aningaasartuutaannaasinnaallutik. Kalaallit Nunaanni akerlianik ingerlasoqarpoq, tassami attaveqarniarneq eqqarsaatigalugu innuttaasut 90 procentii aningaasartuutaapput, sinnerilu 10 procentit aningaasanik isaatitsiviusinnaallutik. Taamaammat nuna tamakkerlugu attaveqarnikkut ingerlatsiniaraanni aningaasarpassuarnik nassaaqqaartoqartariaqarpoq, Kasper Juhl-Nielsen naggasiivoq.
Namminersornerullutik oqartussani Ineqarnermut Attaveqarnermullu pisortaqarfimmi souschef-i Kasper Juhl-Nielsen oqarpoq Inu:IT A/S-ip satelitsinik immikkut attaveqaateqalernissamut qinnuteqarnera inatsisit malissagaanni iluatsissinnaanngikkallartoq.
