Attaveqaatit atorlugit nakorsiarneq

Kalaallit Nunaanni peqqinnissaqarfiit attaveqaatit atorlugit nakorsiartitsisarnissaq atorluarneqarnerusariaqartoq, Peqqinnissamut Naalakkersuisoq Asii Chemnitz Narup oqarpoq. Attaveqaatit atorlugit nakorsiartitsisarneq pillugu EU-p Norgemi Tromsømi ataatsimeersuaartitsinera ingerlanneqarmat, Kalaallit Nunaat peqataatitaqarpoq.

Attaveqaatit atorlugit nakorsiartitsisarneq nakorsanut allanullu peqqinnissaqarfiup iluani sulisunut oqilisaatasinnaavoq, qinnguartaatikkut assilisat ajornanngitsuaqqamik internetikkut attaveqaatikkut Kalaallit Nunaata iluani Danmarkimullu nassiunneqarsinnaasarmata.

Aamma peqqinnissaq pillugu qaammarsaaniarnermi attaveqaatit atorluarneqarsinnaasut Asii Chemnitz Narup oqarpoq.

- Tromsø-mi ataatsimeersuarnermi peqataasimanera pissarsiaqaatigalugulu isumassarsiffigeqaara, Peqqinnissamut Naalakkersuisoq oqarpoq, aaqqissuulluakkamillu attaveqaatit atorlugit nakorsiartitsisarnissaq aallarnisarneqassasoq Saii Chemnitz Narup-ip oqaatigaa, Tromsø-milu attaveqaatit atorlugit nakorsiartitsisarnerni siuttuusut suleqatigineqarnerulernissaat sulissutiginiarneqalerpoq.