Attaveqaatit aaqqinneqarput
Kullorsuaq Nuussuarlu tallimanngormalli avammut attaveqaatai tamavimmik ajoquteqarsimapput. Ullumimiillu Upernaviup avannaatungaaniittoq sakkortusaavimmi ajoqutaasimasut Telep aaqqippai.
Upernaviup nunaqarfiisa ilaanni Kullorsuarmi Nuussuarmilu telemut attaveqaatit ajornartorsiutigineqarnerannut sermernarnera pissutaasimavoq. Tele Greenlandimi paasissutissiinermut pisortaq, Malînánguaq Marcussen Mølgaard taama ilisimatitsivoq.
- Ajornartorsiutinut silap allanngorarnera pissutaanerpaavoq. Sialleriarluni kinguninngua issilerpoq, sunalu tamarmi sermerpoq. Ajornartorsiutit qaangerneqareerput, Malînánguaq Marcussen Mølgaard nassuiaavoq.
Naajaanut qarasaasiakkut attaveqarneq suli ajornartorsiutigaarput. Internetikkut attaveqaatit taavani ajornartorsiutaanerupput, oqarasuaatikkulli attaveqaatit ajoquteqanngillat. Teknikkikkut ajornartorsiutit Telemiit iluarsiniarneqarput, Telemilu sulisut peqatigalugit nunaqarfinni mekanikeri maanna misissuivoq.
